Një javë para El Clasico-s, Barcelona shënon fitore të vështirë në udhëtim te Athletic Bilbao

Barcelona e ka mposhtur në udhëtim Athletic Bilbao-n me rezultat 0:1 në ndeshjen e javës së 25-të në La Liga.

Në një ndeshje që ishte e luftuar dhe me shumë raste nga fillimi deri në fund, u shënua vetëm një gol.

Ai erdhi në fundin e pjesës së parë, kur Raphina e kaloi në epërsi Barcelonën, pas asistimit të Seri Busquets.

Pjesa e dytë në përgjithësi ishte më e mirë për Bilbao-n, por Barça arriti të mbrohej mirë, falë edhe disa intervenimeve të portierit Andre Ter Stegen.

Sa më shumë afrohej përfundimi, aq më spektakolar ishte takimi. Bilbao arriti ta barazonte rezultatin në minutën e 87-të me anë të Inaki Williams, por goli u anulua nga sistemi VAR për një prekje të topit me dorë nga Iker Muniain.

Vëllezërit Williams e patën edhe një rast të artë në minutat shtesë, por Nico nuk u tregua i saktë para portës, kur vëllai i tij pasoi.

Me këtë sukses, ekipi i Xavi-t ruan ende epërsinë prej nëntë pikësh me ndjekësin, Real Madrid-in në vendin e dytë.

Ndërkohë, Bilbao gjendet në vendin e nëntë me 33 pikë.

Në xhiron e ardhshme Barcelona do të ballafaqohet në “El Clasico” me Real Madrid-in.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.