Një gjeneral në krye të shtetit, PS propozon Bajram Begajn

Pas mbledhjes së Kryesisë së Partisë Socialiste (PS), pasditen e 3 qershorit është bërë publik emri i kandidatit zyrtar të mazhorancës për President të Republikës së Shqipërisë.

Bëhet fjalë për Bajram Begajn, shefi i Shtabit të Forcave të Armatosura.

Ishte vetë kryeministri i Shqipërisë dhe njëkohësisht kreu i PS-së, Edi Rama, ai që bëri lajmin publik.

Për kryeministrin, Begaj është “shëmbëlltyra e atij normaliteti, e asaj qytetarie, e sensit të shërbimit ndaj vendit dhe njerëzve të këtij vendi, për të cilin ajo zyrë ka një nevojë urgjente”.

Rama theksoi se Begaj do të jetë një komandant i duhur “në krye të ushtrisë, jo si Ilir Meta, i cili është një kaçak”.

Begaj do të jetë i treti president në Republikën e Shqipërisë që vjen nga bota ushtarake pas Alfred Moisiut dhe Bujar Nishanit.

Ai, më parë, ka shërbyer si Komandant i Komandës së Trajnimit dhe Doktrinës, Shef i Njësisë Mjekësore Ushtarake, Drejtor i Inspektoratit Shëndetësor dhe Kryeinspektor dhe Këshilltar i Inspektoratit Shëndetësor në Shtabin e Përgjithshëm të Forcës së Armatosur Shqiptare.

Rama sqaroi se, në fillim, janë përjashtuar emrat e ardhur nga grupi parlamentar dhe ato të ardhur nga jeta politike.

“Ne duhet t’u japin shqiptarëve një president që nuk ka karrierë në PS”, tha Rama, duke shtuar se në fund të diskutimit ka pasur 3 kandidatura gra dhe 3 burra.

Të shtunën e 4 qershorit ky emër pritet të depozitohet në Kryesinë e Kuvendit – pasi të jetë firmosur nga të paktën 20 deputetë – ku disa orë më vonë do të mbahet edhe votimi.

Në mbledhje u diskutua mbi një listë prej 26 kandidaturash të propozuara nga ligjvënësit socialistë.

Takimi në selinë rozë zgjati mbi dy orë dhe u zhvillua pa praninë e telefonave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.