![](https://albanianpost.com/wp-content/uploads/2023/12/LOGO-BACKGROUND12.jpg)
Departamenti Ligjor dhe i Licencimit në Federatën Shqiptare të Futbollit (FSHF) ka informuar të gjitha klubet e futbollit (për djem dhe vajza) dhe opinionin publik në vend se ka filluar procesi i licencimit të klubeve aplikante për një licencë në kompeticionet e FSHF-së dhe UEFA-s për sezonin e ardhshëm 2024-25.
Procesi do të përmbyllet më 31 mars 2024, sipas afateve të vendosura nga FSHF dhe UEFA.
Gjatë kësaj periudhe klubet aplikante për licencë duhet të paraqesin në Sektorin e Licencimit në FSHF-së të gjithë dokumentacionin e kërkuar për të përmbushur gjashtë kriteret që kërkohen për të përmbyllur me sukses këtë proces.
Kriteret që duhet të plotësohen janë: kriteri sportiv, ai i përgjegjësisë sociale në futboll, i infrastrukturës, kriteri i administratës dhe personelit, kriteri ligjor dhe kriteri financiar.
Aplikimet pas afateve të vendosura, nuk do të merren parasysh dhe do të jenë subjekt i Komisionit të Licencimit deri në moslejim të pjesëmarrjes në kompeticionet e UEFA-s dhe FSHF-së për sezonin 2024–25.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com