Nis implementimi i marrëveshjeve të Procesit të Berlinit, qytetarët e Bosnje-Hercegovinës futen pa viza në Kosovë

Kosova është shteti i parë në Ballkanin Perëndimor që i ka ratifikuar tre marrëveshjet e Procesit të Berlinit dhe shteti i parë që po i zbaton ato në praktikë, duke vazhduar implementimin përkundër mos-zbatimit/implementimit të marrëveshjeve nga Mali i Zi dhe Bosnje-Hercegovina.

Adnan Çerimagiç, analist i lartë për Ballkanin Perëndimor në institutin kërkimor “European Stability Initiative”, nëpërmjet një postimi në llogarinë e tij në “Facebook”, njoftoi se ka hyrë në Kosovë pa pasur nevojë për vizë, falë marrëveshjes së lëvizshmërisë në kuadër të Procesit të Berlinit.

“Hera e parë që nga viti 2014 që hyra në Kosovë pa pasur nevojë për vizë. Falë Procesit të Berlinit. E njëjta gjë duhet të jetë edhe për qytetarët e Kosovë kur udhëtojnë për në Bosnje-Hercegovinë. Sa më shpejt aq më mirë!”, shkroi Çerimagiç në llogarinë e tij.

Qeveria e Kosovës, më 8 shkurt, pati miratuar marrëveshjen për lëvizjen e lirë vetëm me letërnjoftim në Ballkanin Perëndimor. Më 3 nëntor 2022, gjashtë shtetet e Ballkanit Perëndimor arritën edhe marrëveshjen për njohjen e kualifikimeve të arsimit të lartë dhe atë për njohjen e kualifikimeve profesionale.

Shqipëria, Serbia dhe Maqedonia e Veriut gjithashtu kanë ratifikuar tre marrëveshjet e Procesit të Berlinit, që kanë të bëjnë me lëvizjen vetëm me letërnjoftim, njohjen e kualifikimeve të arsimit të lartë dhe njohjen e kualifikimeve profesionale të mjekëve, stomatologëve dhe arkitektëve.

Marrëveshjet janë nënshkruar nga të gjitha shtetet e Ballkanit Perëndimor, por të njëjtat nuk janë ratifikuar nga Mali i Zi dhe Bosnje-Hercegovina. Megjithatë, kjo nuk i pengon shtetet tjera që i kanë ratifikuar marrëveshjet të vazhdojnë me fazën implementuese. Këtë po e dëshmon Kosova.

Jo funksionaliteti i parlamentit malazez për shkak të ngërçit politik atje dhe destruktiviteti i presidentit nacionalist të entitetit serb në Bosnje-Hercegovinë, Milorad Dodik, janë bërë pengesë për ratifikimin dhe implementimin e marrëveshjeve nga shtetet respektive.

Procesi i Berlinit nisi në vitin 2014 si një iniciativë diplomatike lidhur me të ardhmen e zgjerimit të Bashkimit Evropian me fokus raportet e BE-së me vendet e Ballkanit Perëndimor që kishin filluar ta humbnin durimin me procedurat burokratike të unionit që ngjanin si pengesa pa cak.

Procesi i Berlinit: Më në fund janë plotësuar kushtet e aneksit, me 1 qershor fillon implementimi i Marrëveshjeve për Letërnjoftime, Diploma dhe Vende Pune

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.