Nikolla takim me ambasadorët e vendeve të Quint-it, vlerëson kontributin

Kryetarja e Kuvendit, Lindita Nikolla, ka mbajtur një takim pune me përfaqësuesit e përhershëm të vendeve të Quint-it në OSBE.

Më konkretisht me ambassadorin e Italisë Stefano Baldi, ambasadorin e Mbretërisë së Bashkuar Neil Holland, ambasadoren e Gjermanisë Susanne Schütz, ambasadoren e Francës Fatène Benhabylès-Foeth dhe zëvendësambasadoren e SHBA-ve Katherine Brucker.

Nikolla ka theksuar se Prezenca e OSBE-se në Shqipëri ka qenë dhe mbetet një partner i besueshëm, në mbështetje të reformave të thella dhe gjithëpërfshirëse, të cilat kanë nxitur e mbështetur demokratizimin dhe integrimin euro-atlantik.

Sakaq, ajo ka vlerësuar kontributin dhe arritjet në avancimin e reformës zgjedhore, forcimin e shtetit të së drejtës dhe sistemit të drejtësisë, luftën kundër korrupsionit, trafikimit të qenieve njerëzore dhe ndaj kërcënimeve ndërkombëtare dhe kombëtare të Shqipërisë dhe rajonit.

Presidenca e suksesshme e Shqipërisë gjatë vitit 2020 shërbeu si një përvojë për suksesin e mandatit e saj dyvjeçar si anëtare e zgjedhur e KS të OKB.

Nikolla i falënderoi ambasadorët edhe për mbështetjen e Kosovës nga ana e vendeve të tyre, si edhe nga misionet e tyre pranë OSBE-së.

Ndërkohë, përfaqësuesit e përhershëm të vendeve të Quint-it vlerësuan bashkëpunimin e deritanishëm të Shqipërisë me Prezencën e OSBE-së, arritjet në avancimin dhe thellimin e reformave, duke u fokusuar në punën që po bëhet për reformën zgjedhore dhe zbatimin e rekomandimeve të ODIHR-it, reformën në drejtësi, barazinë gjinore, luftën kundër korrupsionit dhe krimit të organizuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.