Jetesë & Stil

Nicolò Zaniolo dhe Chiara Nasti bëjnë publike lidhjen e tyre


Ylli i klubit futbollistik të Romës, Nicolò Zaniolo, ka bërë publike lidhjen e tij me blogeren e modës, Chiara Nasti.

Thashethemet rreth lidhjes së tyre kishin filluar në ditën e Shën Valentinit kur ata u panë së bashku në një dyqan të njohur lulesh në kryeqytetin italian.

Disa ditë pas daljes së tyre të parë së bashku në publik, ata kanë vendosur të konfirmojnë historinë e tyre të dashurisë përmes një fotografie romantike, të postuar në profilin e Instagram-it të Chiarës.

Kjo lidhje e futbollistit Zaniolo ishte një befasi e vërtetë për publikun nisur nga fakti që vetëm para pak javësh nga mediat e shtypit rozë dhe të afërm të lojtarit, aludohej se ai po takohej me aktoren rumune, Madalina Ghenea.

Zaniolo e Ghenea, të cilët ishin shumë aktiv në rrjetet sociale duke postuar fotografi në shoqërinë e njëri tjetrit, kanë vendosur t’i ndajnë rrugët në heshtje, duke mos bërë shumë “zhurmë” mediatike.

Ndryshe, njëra ndër arsyet se pse Nicolo dhe Madalina prishën raportin e tyre, sipas tabloideve italiane është fakti se ish e fejuara e tij, Sara Scaperotta, pret një fëmijë nga vetë lojtari, pavarësisht se të dy kishin prishur marrëdhënien.

Sara është pesë muajsh shtatzënë dhe foshnja e ish çiftit do të vijë në jetë gjatë kësaj vere.

Por, fakti se ylli i Romës po bëhet baba, nuk paraqet fare problem për të dashurën e tij të re, Chiara Nastin.

Madje, Zaniolo dhe Nasti kanë dashur të vulosin premtimin e tyre të dashurisë me një tatuazh.

Ata kanë bërë nga një tatuazh me zemër të shpuar me shigjetë, veprim të cilin edhe e kanë publikuar në rrjete sociale.

Edhe pse lidhja filloi vetëm disa javë më parë, çifti po i merr gjërat seriozisht, duke lënë gjurmë të pashlyeshme edhe në lëkurë.

Chiara është një personazh me ndikim në rrjetet sociale, ndërsa numëron mbi 1.8 milionë ndjekës në Instagram.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore