Kancelarja gjermane, Angela Merkel, u shfaq në praninë e krerëve të qeverive të Ballkanit Perëndimor, në pritje të konferencës së përbashkët për shtyp me kryeministrin e Shqipërisë, Edi Rama.
Merkel vëzhgoi nga afër ambientet e Tirana Business Park, i cili është një investim i qeverisë gjermane.
Ky takim zhvillohet pas përfundimit të ndalesës së parë në Pallatin e Brigadave, mes kryeministrit Rama dhe kancelares Merkel.
Delegacionet e krerëve të pesë shteteve të tjera të Ballkanit Perëndimor kishin mbërritur më herët në Rinas.
I pari që arriti pranë Tirana Business Park ishte ai i Maqedonisë së Veriut.
Më pas parakaluan me radhë edhe ai serb, malazez, delegacioni i Kosovës, dhe në fund ai i Bosnjë dhe Hervegovinës.
Pas mbledhjes së parë në ballkonin e njërës prej godinave të Tirana Business Park, krerët e qeverive të Ballkanit Perëndimor ndanë një komunikim të shkurtër me kancelaren Merkel.
Dita e Merkel-it
Ndalesa e parë e kancelares gjermane, Angela Merkel, sapo mbërriti në Tiranë, ishte në Pallatin e Brigadave, ku u prit nga kryeministri i Shqipërisë, Edi Rama.
Me një ceremoni në nder të saj, u luajtën si himni i Republikës Federale të Gjermanisë, ashtu edhe himni i Republikës së Shqipërisë.
Më herët, ajo u prit nga ministrja për Evropën dhe Punët e Jashtme, Olta Xhaçka, në Aeroportin e Rinasit.
Pas përfundimit të ceremonisë pritëse, kancelarja u takua me delegacionin shqiptar, që udhëhiqej nga kryenegociatori për Zhvillimin e Negociatave për anëtarësimin e Shqipërisë në Bashkimin Evropian, Zef Mazi.
Sot, më 14 shtator, Angela Merkel po zhvillon vizitën e saj të fundit në Shqipëri si Kancelare e Republikës Federale të Gjermanisë.
Pasi përmbylli vizitën e saj në Serbi një ditë më parë, ku u takua me presidentin serb, Aleksandër Vuçiç, Merkel po viziton Shqipërinë.
Pas përfundimit të takimit, në rang kryeministral në Shqipëri me gjashtë vendet e Ballkanit Perëndimor, Merkel dhe Rama do të mbajnë një konferencë të përbashkët për shtyp.
Agjenda
10.20 – Ceremonia e mikpritjes në Pallatin e Brigadave
10.30 – Takim mes kryeministrit Edi Rama dhe kancelares Angela Merkel në Pallatin e Brigadave
11.00 – Takim bilateral mes dy delegacioneve në Pallatin e Brigadave
11.50 – Mbërritja e kryeministrit dhe krerëve të qeverive të Ballkanit në Tirana Business Park
11.55 – Mbërritja e kancelares Merkel në Tirana Business Park
12.00 – Foto familjare me krerët e delegacioneve në Tirana Business Park
14.35 – Konferencë për shtyp mes kryeministrit Rama dhe kancelares Merkel në Tirana Business
Vizita “e fundit” si kancelare në Tiranë
Kjo vizitë e Merkel-it është e fundit si kancelare jashtë shtetit. Ajo ka zgjedhur pikërisht Shqipërinë për të takuar liderët e Ballkanit Perëndimor, në kuadër të Procesit të Berlinit.
Iniciativa e nisur nga Merkel dhe e pagëzuar si “Procesi i Berlinit” ka qenë ndërmarrja dhe suksesi më i madh i kancelares, e cila tashmë po afron dy dekada në pushtet.
Burime të Albanian Post nga Berlini kanë bërë me dije se takimi i Tiranës është edhe një tentativë e fundit që Merkel t’i japë një shtytje partisë së saj, Unionit Kristian-Demokratik (CDU), në zgjedhjet që pritet të mbahen më 26 shtator.
Veç kësaj, burimet thonë se është zgjedhur Tirana, si notë falënderuese e Merkel-it për qeverinë shqiptare dhe kryeministrin Edi Rama, si lideri më aktiv dhe influencues në shtyrjen përpara të synimeve të Procesit.
Lajmi në përditësim…
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Thaçi: Ëndrra ime është që të gjithë shqiptarët të jetojnë në një shtet
-
Mbi 14 milionë turistë priten këtë vit, Balla: Policia e Shtetit i ka marrë të gjitha masat
-
Aksioni i Frontex në Ballkan jep efekt, bien drastikisht kalimet e jashtëligjshme
-
Peleshi viziton qendrën e Inovacionit të Kërkimit dhe Mbrojtjes në Hungari
Lajmet kryesore
-
Aksioni i Frontex në Ballkan jep efekt, bien drastikisht kalimet e jashtëligjshme
-
Mbi 14 milionë turistë priten këtë vit, Balla: Policia e Shtetit i ka marrë të gjitha masat
-
Ose të dëgjojë SHBA-të ose të përgatitet për përshkallëzim – zgjedhja i takon Izraelit
-
Kurti për vizitën dy ditore në Gjermani: Kryefjala e vizitës ishte rëndësia e anëtarësimit të Kosovës në KiE