Film

Netflix publikon imazhin e parë të Imelda Staunton në rolin e Mbretëreshës Elizabeth II


Imelda Staunton në rolin e Mbretëreshës Elizabeth II

Platforma “Netflix” ka publikuar imazhin e parë të Imelda Staunton-it që e zëvendësoi Olivia Colman në rolin e Mbretëreshës Elizabeth II gjatë sezonit të pestë të serisë “The Crown”.

Realizimi i dramës mbretërore që është mes prodhimesh kinematografike më të shtrenjta të kësaj platforme, ka nisur së xhiruari në fillimin të këtij muaji në Mbretërinë e Bashkuar.

Menjëherë pas xhirimeve, një fotografi e Imeldas u postua në profilin zyrtar të serisë në Twitter me përshkrimin: “Një vështrim i hershëm i Mbretëreshës sonë të re Elizabeth II, Imelda Staunton”.

Staunton zëvendëson Colman, e cila fitoi një nominim Emmy për portretizimin e Mbretëreshës, dhe Imelda do të përfaqësojë Elizabeth II gjatë mandatit shtatëvjeçar të kryeministrit John Major.

Ndërkohë, Major luhet nga Jonny Lee Miller, ndërsa Lesley Manville është princesha Margaret, Jonathan Pryce do të luajë rolin e princit Philip dhe Elizabeth Debicki do të shfaqet si princesha Diana.

Në anën tjetër, aktori, Dominic West është konfirmuar të luaj në rolin e Princit Charles.

Sipas Deadline, historitë në sezonin e pestë do të përfshijnë një intervistë bombastike me princeshën Diana për “BBC”, e cila doli në titujt e mediave muajt e fundit, pasi një hetim zbuloi mashtrimin e reporterit Martin Bashir në sigurimin e intervistës.

Gjatë një interviste dhënë për “BBC”, Staunton, ka thënë se në sezonin e ri rolet kanë qenë shumë më të komplikuara pasi që “The Crown” i kësaj here regjistron periudhat e ndryshme të historisë britanike.

“Mendoj se sfida ime shtesë, sikur të kem nevojë për të, është se tani jam duke bërë një version të mbretëreshës me të cilën jemi njohur më mirë. Me Claire Foy ishte pothuajse histori dhe tani po luaj një të tillë njerëzit mund të thonë ‘ajo nuk punon’, ‘nuk është kështu’”, ka shpjeguar Staunton.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore