Nestle – kompania që prodhon KitKat-in – ‘duhet të reduktojë produktet e pashëndetshme’

Kompanisë Nestle po i kërkohet të zvogëlojë përqindjen e ushqimeve të pashëndetshme që shet dhe të luajë rolin e saj për shëndetin global.

Organizata bamirëse e investimeve ShareAction ka thënë se 40 për qind e shitjeve të ushqimeve të përditshme të Nestle në Mbretërinë e Bashkuar ishin me sasi të larta në kripë, sheqer ose yndyrë.

Vetë kompania ka thënë se raportimi në fjalë mbi shitjet e saj globale ishte i pari në botë dhe u zotua të vendosë një objektiv për shitje më të shëndetshme më vonë këtë vit.

Por ShareAction ka thënë se donte gjithashtu që Nestle të reduktonte sasinë e ushqimeve më të pashëndetshme që shet.

Nestle është kompania më e madhe e ushqimit në botë dhe zotëron marka si KitKat dhe Shreddies.

Në prill, ajo nxori në treg drithëra të reja mëngjesi KitKat në supermarketet në të gjithë Mbretërinë e Bashkuar. Përmban 7,4 gram sheqer për 30 gram.

Dhe kjo është më e lartë se marrja mesatare e rekomanduar e sheqerit të rafinuar për vakt për të rriturit.

Sipas Nestle, drithërat KitKat ishin krijuar për t’u shijuar si një opsion i rastësishëm për mëngjes.

ShareAction, një organizatë joqeveritare e përgjegjshme për investime, ka koordinuar thirrjet nga rreth 26 investitorë – të cilët kanë më shumë se 2.64 trilion paund në asete.

Simon Rawson, zëvendës shefi ekzekutiv i ShareAction, ka thënë se “Nestle ka thënë se dëshiron të shesë ushqime më të shëndetshme, por nuk ka dhënë garanci se do të adresojë gjithashtu shitjet e saj të ushqimit më pak të shëndetshëm, gjë që është thelbësore për të kthyer valën kundër efekteve të dëmshme të shëndetit të lidhura me dietën”.

Po ashtu ka shtuar se gjigandi zviceran i ushqimit duhet të ribalancojë shitjet e tij për të sjellë dieta të balancuara brenda mundësive për njerëzit në mbarë botën.

Një zëdhënës i Nestle ka thënë sakaq se kishte vendosur një standard të ri në transparencën e korporatave në mars.

“Ne jemi kompania e parë që raportojmë mbi vlerën ushqyese të të gjithë portofolit tonë global kundër një skeme të vetme të profilizimit të lëndëve ushqyese të njohur nga jashtë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.