Nënvarianti BA.2, më i rrezikshëm se variantet e kaluara

Virusi BA.2 – nënvariant i variantit të coronavirus-it Omicron – jo vetëm që po përhapet më shpejt se “kushëriri” i tij i largët, por gjithashtu mund të shkaktojë sëmundje më të rënda, aq sa mund t’i dobësojë disa nga “armët” kryesore që kemi kundër COVID-19.

Eksperimentet e reja laboratorike tregojnë se BA.2 mund të shkaktojë sëmundje serioze.

Dhe si Omicron, duket se i shpëton kryesisht imunitetit të krijuar nga vaksinat.

“Ky mund të jetë një virus më i keq se BA.1 dhe mund të jetë në gjendje të transmetohet më mirë dhe të shkaktojë sëmundje më të keqe”, thotë Dr. Daniel Rhoads, shef i seksionit të mikrobiologjisë në Klinikën Cleveland në Ohio.

BA.2 ndryshon shumë, në krahasim me strukturën e virusit origjinal, që shkaktoi pandeminë që u shfaq në Wuhan, Kinë.

Gjithashtu, ai ka dhjetëra ndryshime të gjeneve që janë të ndryshme nga lloji origjinal Omicron, duke e bërë atë të dallueshëm nga virusi më i fundit pandemik.

Kei Sato, studiues në Universitetin e Tokios që kreu studimin, argumenton se këto gjetje vërtetojnë se BA.2 nuk duhet të konsiderohet një lloj Omicron-i dhe se duhet të monitorohet më nga afër.

Të dhëna të përziera për ashpërsinë e nënvariantit

BA.2 është rreth 30% deri në 50% më ngjitës se Omicron. Ai është zbuluar në 74 vende të botës.

Qendra e SHBA-ve për Kontrollin dhe Parandalimin e Sëmundjeve vlerësojnë se rreth 4% e amerikanëve me COVID-19 tani kanë infeksione të shkaktuara nga BA.2, por shumë pjesë të tjera të botës kanë më shumë përvojë me këtë variant.

Sipas raportit javor epidemiologjik të Organizatës Botërore të Shëndetësisë (OBSH), ky nënvariant është bërë dominues në të paktën 10 vende të tjera, si në Bangladesh, Brunei, Kinë, Danimarkë, Guam, Indi, Mal të Zi, Nepal, Pakistan dhe Filipine.

Por, ka prova të përziera mbi agresivitetin e BA.2. Regjistrimet në spital vazhdojnë të bien në vendet ku BA.2 ka fituar një terren, si Afrika e Jugut dhe Britania.

Por, sipas OBSH-së, në Danimarkë, ku BA.2 është bërë shkaku kryesor i infeksioneve, shtrimet në spital dhe vdekjet janë në rritje.

Rezistent ndaj trajtimeve me antitrupa monoklonale

Studimi i ri zbuloi se BA.2 mund të kopjojë veten në qeliza më shpejt se BA.1, versioni origjinal i Omicron-it. Është gjithashtu më i aftë për të bërë që qelizat të ngjiten së bashku. Kjo është shqetësuese, sepse këto grumbuj më pas bëhen fabrika për të prodhuar më shumë kopje të virusit.

Kur studiuesit infektuan kavjet e laboratorit me versionet BA.2 dhe BA.1, kafshët e infektuara me BA.2 u sëmurën më shumë dhe kishin funksion më të keq të mushkërive.

Në mostrat e indeve, mushkëritë e brejtëseve të infektuar me BA.2 dalloheshin më shumë dëmtime sesa ato të infektuara nga BA.1.

Ngjashëm me Omicron-in origjinal, BA.2 ishte në gjendje të depërtonte antitrupat në gjakun e të vaksinuarve kundër Covid-19.

Gjithashtu, ai ishte rezistent ndaj antitrupave të njerëzve që ishin infektuar me Covid-19 në fillim të pandemisë, duke përfshirë Alfa dhe Delta.

BA.2 ishte pothuajse plotësisht rezistent ndaj disa trajtimeve me antitrupa monoklonale.

Por, një lajm i mirë!

Antitrupat në gjakun e njerëzve që kishin pasur kohët e fundit Omicron, gjithashtu dukej se kishin njëfarë mbrojtjeje kundër BA.2, veçanërisht nëse ata ishin të vaksinuar.

Edhe pse BA.2 duket më ngjitës dhe patogjen se Omicron, ai mund të mos përfundojë, duke shkaktuar një valë më shkatërruese të infeksioneve COVID-19.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.