Negociatat për Shqipërinë mund të hapen sot

Asgjë nuk është e pamundur!

Negociatat me Shqipërinë mund të hapen gjatë ditës së sotme dhe ka shpresë e optimizëm për një vendim pozitiv të Këshillit të Evropës mbi këtë çështje.

Kështu mëson Albanian Post nga burime konfidenciale diplomatike pranë Qeverisë, në vazhdën e zhvillimeve të Samitit të NATO-s, i cili po mbahet në Madrid dhe përmbyllet pikërisht sot, më 30 qershor.

Vetë kryeministri Edi Rama ka qenë tepër i angazhuar gjatë takimit me liderët e vendeve anëtare të Aleancës së Atlantikut të Veriut, ku është parë të lobojë fuqimisht, kryesisht me ministrin e Jashtëm të Maqedonisë së Veriut, Bujar Osmani, presidentin francez Emmanuel Macron, si edhe kancelarin gjerman, Olaf Scholz.

Çdo gur i lëvizur

Kryeministri i Shqipërisë, Edi Rama, po lëviz çdo gur të mundshëm për të bërë të mundur hapjen e negociatave të Shqipërisë me Bashkimin Evropian dhe kjo vihet re qartë, pasi ai ka bërë bashkë të gjithë liderët perëndimorë për të diskutuar mbi këtë çështje.

Fillimisht, Rama u pa me presidentin bullgar, Rumen Radev, shteti i të cilit vetëm një javë më parë votoi më në fund pro heqjes së vetos ndaj Maqedonisë së Veriut. Kjo veto bllokonte edhe procesin për Shqipërinë.

Duke qenë se pengesa nuk është më e pranishme, fjala i takon Maqedonisë së Veriut, për të pranuar propozimin e presidentit francez, Emmanuel Macron.

Për këtë arsye, Rama ka shkuar të flasë me ministrin e Jashtëm të Maqedonisë së Veriut, Bujar Osmani.

Këtë të fundit madje, Rama “e ka marrë me vete”, për të shkuar më pas te vetë Macron dhe te kancelari gjerman Olaf Scholz.

Nga gjestikulacioni i të parit të Qeverisë shqiptare duket qartë se objekti i bisedës është ai i propozimit francez për hapjen e negociatave.

Vetë kryeministri, nëpërmjet një postimi në Facebook, ka kryqëzuar gishtat: Mbase sot lajmi i mirë…

Kështu shkruan ai, referuar hapjes së negociatave.

Nëse vërtet do të ndodhë, mbetet për t’u parë.

Çfarë mësoi Albanian Post përpara Samitit?

Nëse autoritetet bullgare pranojnë ndryshimet e qeverisë maqedonase, atëherë negociatat e Shqipërisë mund të hapen në margjinat e Samitit të ardhshëm të NATO-s.

Kështu bëri të ditur një burim ndërkombëtar diplomatik për Albanian Post, i cili u deklarua në kushte anonimiteti për shkak të ndjeshmërisë së çështjes.

Burimit qeveritar të AP-së, theksoi se mund të kishte një nisje të negociatave të hënën e 27 qershorit. Por, ky plan është vështirësuar.

“Ka një mundësi, por është zbehur, pasi maqedonasit duan t’i bëjnë një amendim të vogël propozimit francez”, sqaron zyrtari ndërkombëtar në kushte anonimiteti.

Sipas burimit, nëse Bullgaria e pranon, miratohet në margjinat e Samitit të Nato-s në Madrid.

“Nëse Bullgaria nuk e pranon, RMV-ja do e refuzojë, pra do jetë Maqedonia e Veriut ajo që nuk do pajtohet me propozimin”, ravijëzoi në përmbyllje zyrtari ndërkombëtar, i cili do të jetë pjesëmarrës në samit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.