Një godinë e çuditshme në Melbourne të Australisë, krejtësisht e errët në normalitetin e saj, fasada e betontë e të cilës zakonisht është bosh, ku katër cepat i ngjajnë disa cilindrave simetrikë, u ndriçua papritur natën e 19 gushtit me një ngjyrë portokalli të ndezur.
Makinat që kalonin në afërsi të zonës filluan të ndalonin. Shoferët dhe pasagjerët në to fërkonin sytë dhe nuk arrinin të kuptonin çfarë po ndodhte dhe çfarë po lexonin.
Shpejt në media sociale, disa pamje ajrore filmuan atë që dukej si një film mondan horror, ku alienët a ndonjë formë virusi vdekjeprurës po bëheshin gati të merrnin kontrollin.
“Fundi është pranë”. Gjithçka do të venitet”.
Shkruhej kështu në dy fasadat kryesore të atij objekti, i cili tashmë i ngjante një lloji depozite radioaktive vaki-ndjellëse.
U vunë në lëvizje edhe mediat duke e pasqyruar ngjarjen e çuditshme që po ndodhte në kontinentin e largët dhe duke kërkuar shpjegime.
Shpjegime, që më mirë se rrjeti, në atë çast nuk i dinte askush!
Hataja do të ndodhë, por jo hataja që të gjithë mendojnë kur diçka e tillë lexohet.
Përkundrazi! “Ka tre kapituj në këtë histori”. “Abisi gjithashtu ju sheh juve”. “Siguri e papërgatitur”.
Nuk ju thotë ende gjë? Epo ndoshta nuk jeni dashamirës të Abel Tesfaye, i njohur në art si The Weeknd, i cili në këtë mënyrë tejet origjinale, ka vendosur jo thjesht ta sjellë veten në formatin më të fundit të tijin me një album të ri në pritje, por edhe t’i shlyejë një borxh të madh që i kishte Australisë.
Po, një borxh të madh. Sepse, në turin e fundit “After Hours til’ Dawn”, të cilin e ka zhvilluar në SHBA fillimisht, mandej Evropë dhe Amerikë të Jugut, ishin parashikuar edhe disa ndalesa në Australi.
Fatkeqësisht, planet e The Weeknd, edhe pse me tetë koncerte të shitura në kohë rekord në kontinentin e largët, u prishën për arsye të panjohura dhe atij iu desh t’i anulonte datat.
Megjithatë, ai do të jetë atje në tetor në katër data, siç edhe e publikoi vetë, pak orë pasi filluan të qarkullonin në media sociale videot e ndërtesës së famshme në Melbourne.
Më 5 dhe 6 tetor ai do të jetë në Melbourne. Dy data do të ketë edhe në Sydney, më 22 dhe 23 tetor.
Australianët, të cilët e simpatizojnë kantautorin kanadez, kanë shpërthyer në gëzim me publikime në media sociale, duke pritur me padurim shitjen e biletave të reja për të kapur një vend në shfaqje.
Fatlumë do të jenë edhe brazilianët e Sao Paolos, për të cilët më 7 shtator do të ketë një koncert ekskluziv nga The Weeknd, ku do të performohen vetëm këngë nga trilogjia e tij e fundit, duke hamendësuar se do të ketë edhe hite të reja, të papublikuara më herët.
Nuk është krejtësisht e qartë se çfarë ky album do të përmbajë dhe se si do të mbyllet kjo trilogji e radhës nga Tesfaye, por e sigurt është se ky do të jetë i fundit album prej tij me alias The Weeknd, ndaj dhe fansat po e presin me kërshëri atë që do të pasojë After Hours dhe Dawn FM si mbyllje e madhe.
Vetë Tesfaye, pas publikimit të datave, tha se e kishte të pamundur të vijonte projektin e radhës pa i shlyer Australisë borxhin që i kishte nga vjeshta e kaluar.
Por, ka premtuar se projekti i ri është gati dhe me të mbyllur edhe datën e fundit në Sydney, “mbreti i vjeshtës” do të lëshohet me gjethet e fundit tek dëgjuesit nga prodhimtaria e tij prej mbi një dekade.
