“Në gjendje të rëndë dhe me lëndime të rënda trupore”, thotë drejtori i Emergjencës për 23 vjeçaren që pësoi nga rasti në Komunën e Prishtinës

Aktualisht situata shëndetësore e vajzës 23 vjeçare që është lënduar pas rënies së kulmit të ndërtesës së Komunës së re të Prishtinës, është stabile, por që lëndimet trupore që ka marrë janë të rënda.

Drejtori i Emergjencës, Naser Syla, në një bisedë për Albanian Post ka thënë se gjendja e saj vazhdon të jetë e rëndë.

“Stabile është, por gjendjen e ka të rëndë pasi që lëndimet kanë qenë shumë të rënda. Lëndimet i ka marrë në kokë dhe në trup”, tha Syla për AP.

Një person është lënduar pas rënies së kulmit të ndërtesës së Komunës së re të Prishtinës.

Lajmin për Albanian Post e ka konfirmuar zëdhënësi i Policisë së Kosovës, për rajonin e Prishtinës, Agron Borovci.

“Rreth orës 13:00, është raportuar se në rrugën “Nora e Hotit”  në Prishtinë, një person ka marrë lëndime si pasojë e goditjes nga materiale që janë shkëputur nga çatia e një objekti”.

“Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër, e cila është dërguar në QKUK për trajtimin e nevojshëm mjekësor”, ka thënë Borovci për AP.

Ndërsa, ka shtuar se policia ka nisur hetimet për të zbardhur rrethanat.

“Aktualisht policia ka nisur punën për zbardhjen e plotë të të gjitha  rrethanave që karakterizojnë ngjarjen”.

Ekipet e emergjencës së Prishtinës janë në vendin e ngjarjes, teksa rruga është e bllokuar nga Policia për qarkullim të automjeteve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.