Ndryshon ora e muzikës, por jo qëndrimi i bizneseve

Nuk ka ndryshim të qëndrimit të bizneseve në shëtitoren vlonjate të Lungomares, mbi mbylljen e tyre deri në plotësimin e kërkesës për heqjen e orës policore dhe asaj “muzikore”.

Vendimi i fundit i Komitetit Teknik të Ekspertëve, e zgjati me një orë më shumë atë muzikore, duke e lejuar deri në 23:00. Pavarësisht kësaj, asnjë ndryshim nuk ka sjellë në qasjen e bizneseve.

Dhjetëra prej tyre vijojnë të mbeten të mbyllura mbrëmjen e 19 korrikut. Sipas raportimeve që kanë ardhur pranë Albanian Post, kërkesa është e njëjtë dhe e palëkundur: Të hiqet ora policore.

Kjo, pasi sipas pretendimeve të bizneseve në fushën e gastronomisë, aktiviteti më i lartë është ai gjatë orëve të natës.

Por, mbi këtë, më herët gjatë ditës, kryeministri Edi Rama, ka argumentuar se “nuk bëhet fjalë për muzikë, por për ndotje akustike”.

Sipas tij, në çdo vend të botës, oraret e lejuara të muzikës së lartë janë të kornizuara.

“E drejta e atyre që duan zhurmë muzikore tërë natën nuk fiton dot mbi tē drejtën e atyre që natën duan zhurmën e detit”, shkroi Rama në Twitter.

Megjithatë, shenja të protestave ndaj këtij vendimi, ka edhe nga operatorë në vendodhje të tjera.

Kështu, disa pronarë lokalesh në Shëngjin, protestuan ditën e sotme mbi vendimin. Po ashtu, edhe gjatë vijës bregdetare të Lezhës apo Durrësit. “Lufta” më e madhe gjithsesi, është zhvilluar në Vlorë.

Përpos kërkesës, Qeveria duket e palëkundur në vendimin e marrë. Po ashtu duken edhe operatorët, të cilët kanë interesat e tyre të biznesit.

Nuk dihet nëse “lufta e nervave” midis Qeverisë dhe bizneseve do të vijojë edhe në ditët e tjera.

Por, deri në këto çaste, asnjë qëndrim, nga asnjë palë, nuk ka shenja ndryshmi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.