Ndryshime në kabinetin Rama, emërohen disa zv.ministra të rinj

Disa ndryshime janë bërë në kabinetin e Qeverisë së kryeministrit Edi Rama, teksa në pozitë janë emëruar disa zëvendësministra të rinj.

Po ashtu, disa largime kanë ndodhur.

Siç mësohet, janë larguar nga detyra dy zëvendësministret e Turizmit dhe Mjedisit, Vilma Bello dhe Almira Xhembulla.

Në vend të tyre, janë emëruar Ilva Gjuzi si zëvendësministre e Turizmit dhe Mjedisit dhe Sofjan Jaupaj, i cili kishte më parë rolin e Drejtorit për Çështjet Ekonomike dhe Shërbimet Mbështetëse në Ministrinë e Turizmit.

Ndryshime kanë ndodhur edhe në Ministrinë e Ekonomisë, Kulturës dhe Inovacionit, ku Endrit Yzeiraj është shkarkuar nga pozita e zëvendësministrit dhe është emëruar si zëvendësministër për Evropën dhe Punët e Jashtme.

Blerta Rama është emëruar në vend të tij për pozitat e zëvendësministrit të Ekonomisë, Kulturës dhe Inovacionit.

Në Ministrinë për Evropën dhe Punët e Jashtme është emëruar gjithashtu Silda Çepe (Anagnosti).

Këto emërime vijnë pas ndryshimeve të mëparshme, ku Besar Kadija dhe Artemis Malo janë caktuar ambasadorë në Azerbajxhan dhe Kanada, përkatësisht.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.