Një nga sulmuesit më të mëdhenj në historinë e futbollit u nda nga jeta të dielën në mëngjes
Legjenda e Gjermanisë dhe Bayern Munchen, Gerd Muller ka ndërruar jetë në moshën 75 -vjeçare.
Fituesi i Kupës së Botës dhe Kampionatit Evropian u diagnostikua me sëmundjen e Alzheimerit në vitin 2015.
Një deklaratë në faqen e klubit të Bayern lexonte: “Sot bota e FC Bayern qëndron e shtangur. Klubi dhe të gjithë tifozët e klubit po mbajnë zi për vdekjen e Gerd Muller, i cili ndërroi jetë të dielën në mëngjes në moshën 75 vjeç”.
“Muller bëri histori me Bayern dhe ekipin kombëtar të Gjermanisë. Ai shënoi 566 gola të pabesueshëm në 607 paraqitje për Bayern dhe ende mban rekordin për më shumë gola të shënuar në Bundesliga me 365, si dhe ishte golashënuesi më i mirë shtatë herë. Ai shënoi 68 gola në 62 paraqitje për ekipin kombëtar”, përfunduan ata.
Presidenti i Bayern, Herbert Hainer shprehu simpatinë e tij me familjen e Muller dhe premtoi se sulmuesi legjendar do të mbahet mend gjithmonë nga klubi.
“Sot është një ditë e trishtuar, e errët për FC Bayern dhe të gjithë tifozët e tij,” tha ai.
“Gerd Muller ishte sulmuesi më i madh që ka qenë ndonjëherë, dhe një person i shkëlqyer dhe karakter i futbollit botëror. Ne të gjithë jemi të bashkuar në zi të thellë me gruan e tij Uschi, si dhe familjen e tij”.
“FC Bayern nuk do të ishte klubi që ne të gjithë e duam sot pa Gerd Muller, Emri dhe kujtimi i tij do të jetojnë përgjithmonë”, përfundoi Hajner.
Ish portieri Oliver Kahn po ashtu kishte diçka për të thënë, ku shprehu trishtimin e thellë që ai ndjeu kur mori lajmin se Muller kishte ndërruar jetë.
“Lajmi për vdekjen e Gerd Muller na trishton thellë të gjithëve. Ai është një nga legjendat më të mëdha në historinë e FC Bayern, arritjet e tij janë të pakrahasueshme deri më sot dhe do të jenë përgjithmonë pjesë e historisë së madhe, të FC Bayern dhe të gjithë futbollit gjerman. Gerd do të jetë përgjithmonë në zemrat tona”, tha Kahn.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
