Ministrja e Infrastrukturës dhe Energjisë Belinda Balluku në një komunikim publik mbi situatën e furnizimit me energji elektrike tha se “ka pasur shkëputje të energjisë elektrike në të gjithë Shqipërinë.

“Nga ana tjetër jemi informuar se e njëjta situatë ka ndodhur dhe në Malin e Zi, pjesërisht në Kroaci dhe Bosnje Hercegovinë”.

Balluku ravijëzoi se nga analiza e parë, rezulton se volumet e mëdha të sistemit të transmetimin në këto momente, gjithashtu edhe temperaturat shumë të larta në nivele rekord kanë krijuar këtë problematike.

“Duhet thënë që nga puna e mirë që është bërë në terren, kemi arritur të rikuperojmë të gjithë shpërndarjen elektrike përmes linjave në rang vendi brenda 30 minutash, ndërsa Tirana është rikuperuar brenda 17 minutash. Jemi në komunikim të vazhdueshëm me të gjithë bashkëpunëtorët tanë në rajon për ta mbajtur rrjetin e sigurt”.

Çfarë ndodhi?

Këtë të premte të 21 qershorit Shqipëria është përballur me ndërprerje të energjisë elektrike në shumicën e qyteteve.

Nga raportimet paraprake Albanian Post mëson se Tirana, Durrësi, Elbasani, Gjirokastra, Kukësi, Lezha, Saranda dhe Shkodra janë pa energji elektrike.

Vlen të theksohet se kjo është parashikuar si dita më e nxehtë e qershorit, ku temperaturat do të arrijnë në 41 Gradë Celsius.

Ndërkaq, edhe  Mali i Zi ashtu si Shqipëria ka mbetur pothuajse pa energji elektrike.

“Pothuajse e gjithë zona e Malit të Zi është pa energji elektrike për shkak të ndërprerjeve të rrjetit”, njoftoi Sistemi i Shpërndarjes Elektrike Malazeze (CEDIS).

CEDIS tha se energjia u ndërpre për shkak të një ndërprerjeje në rrjetin e Sistemit të Transmetimit Elektrik të Malit të Zi (CGES).

Siç raportojnë mediat rajonale, një pjesë e konsiderueshme e Bosnjë-Hercegovinës është pa energji elektrike.

Ndërprerja e energjisë, OST: Defekti ka filluar nga linja e interkoneksionit me Greqinë, shkak temperaturat