Ndërhyrja në Gjyqësor, “molla e sherrit” e radhës mes Berishës dhe Kim-it

“I bëj thirrje Departamentit të Shtetit të mos lejojë ndërhyrjet e palejueshme të ambasadores Kim në proceset gjyqësore dhe pavarësinë e drejtësisë në Shqipëri”.

Kështu është shprehur ish-kryeministri i Shqipërisë, Sali Berisha, pasditen e 21 prillit për ambasadoren e SHBA-ve në Tiranë, Yuri Kim, sa i takon postimit të kësaj të fundit për ndërhyrjen në proceset gjyqësore.

“Përplasjet” mes Kim dhe Berishës kanë nisur që prej shpalljes së këtij të fundit si persona non-grata nga SHBA-të.

Berisha në daljet e tij publike e ka cilësuar Kim se po sillet si “guvernatore” dhe jo si ambasadore.

Në postimin e fundit në median sociale “Facebook” Berisha theksoi se Kim e “pranoi” që ka ndërhyrë në sistemin e drejtësisë.

1/2 If “interfering in the judicial process” means encouraging judges & prosecutors to do their jobs despite threats or inducements, making clear 🇺🇸 will continue to support implementation of justice reform in 🇦🇱, underlining that no one is above the law, and urging that…

— Ambassador Yuri Kim (@USAmbAlbania) April 22, 2022

Sipas Berishës, Ambasadorja ka ndërhyrë në procesin e gjykimit të ankesës së paraqitur kundër vendimit të Gjykatës së Tiranës për regjistrimin e Statutit të Kuvendit të 11 dhjetorit 2021 – “ankim, i cili është ne kundërshtim flagrant me kodin e procedurës civile dhe praktikën e gjykatave deri më sot”, shkruan Berisha.

Ndër të tjera, ai thekson se Kim për këtë çështje ka kërkuar ndihmën e qeveritareve të rëndësishëm të Partisë Socialiste.

“Duke e konsideruar këtë ndërhyrje një akt të rëndë dhe të papranueshëm shtoj se gjykatat prezumohen të jenë të pavarura dhe çdo ndërhyrje pavarësisht makijazhit përben cenim të hapur të kësaj pavarësie dhe dhunon ligjet e kushtetutën e vendit dhe parimet ndërkombëtare të drejtësisë të pavarur”, thekson më tej Berisha.

Më tej, ai shkruan se, “kur presioni dhe ndërhyrja vijnë nga diplomatë të huaj, përveçse shkelin e sovranitetin dhe ligjet e vendit ata shkelmojnë gjithashtu dhe konventat ndërkombëtare që ndalojnë rreptësisht kthimin e diplomatëve në aktorë politikë”.

Nga ana tjetër, Kim më herët iu përgjigj Berishës se, “nëse ndërhyrja në procesin gjyqësor do të thotë inkurajimi i gjyqtarëve dhe prokurorëve që të bëjnë punën e tyre, pavarësisht kërcënimeve apo nxitjeve, SHBA-të do të vazhdojnë të mbështesin zbatimin e reformës në drejtësi në Shqipëri”.

Sakaq ajo ka ritheksuar për të disatën herë mesazhin e saj se “askush nuk është mbi ligjin”.

“Duke kërkuar që të gjithë ne duhet të bëjmë pjesën tonë për të luftuar kundër korrupsionit dhe mosndëshkimit, atëherë ‘PO’, SHBA-të e kanë bërë dhe do të vazhdojnë ta bëjnë pikërisht këtë, sepse lufta kundër korrupsionit dhe përpjekjet për të minuar demokracinë përbëjnë një interes thelbësor të sigurisë kombëtare të SHBA-ve”, vijoi Kim duke ju drejtuar akuzave të Berishës për ndërhyrjen e saj në sistemin gjyqësor.

Kujtojmë se “sherri” u thellua edhe më shumë pasi Gjykata e Apelit ka pranuar ankimimin e Partisë Demokratike, nga kryetari i mandatuar Enkelejd Alibeaj.

Ankimi i tij lidhej me vendimin e Gjykatës për njohjen e ndryshimeve statutore të dala nga Kuvendi Kombëtar i 11 dhjetorit – i thirrur nga ish-lideri i Partisë Demokratike.

Konkretisht me njohjen e statutit të 11 dhjetorit ra vendimi i ish-kryetarit të bluve Lulzim Basha, i cili një ditë përpara fillimit të punimeve të Legjislaturës së re – më 9 shtator 2021 – përjashtoi Sali Berishën nga Grupi Parlamentar i PD-së.

Ky vendim i Bashës erdhi pas shpalljes së ish-kryeministrit dhe familjes së tij si persona non-grata nga SHBA-të.

Pikërisht ky vendim i Departamentit Amerikan të Shtetit, më 19 maj të vitit 2021, do të sillte një përçarje “të thellë” të demokratëve.

Por, si kundërpërgjigje ndaj “përjashtimit nga Basha”, Berisha nisi menjëherë një aksion, duke mbajtur një seri foltoresh për të mbledhur firmat e delegatëve për thirrjen e Kuvendit Kombëtar.

Përpos këtyre, Berisha që në krye të herës ka përmendur faktin se zotëronte prova që në Gjykatë, përveç kryeministrit Edi Rama, “diplomatë dhe ambasadorë kanë ndërhyrë fuqishëm në gjykatë”.

“Edi Rama po përdor si mashë, po bëhen presione të jashtëzakonshme në gjykatë, të gjithanshme. Nëse s’do të kisha dy burime nuk do ta thosha”, deklaroi Berisha më 12 prill nga selia blu.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.