Ndërhyrja e Kryeministrit të Kosovës, Albin Kurti, në zgjedhjet në Maqedoni të Veriut, sipas Artan Grubit, do të jetë e njëjtë me ato të kaluarat: pa sukses.
Këto komente, zëvendëskryeministri shqiptar i Maqedonisë së Veriut, nëjherit funksionar i lartë i Bashkimit Demokratik për Integrim (BDI), i ka bërë në një intervistë për Albanian Post.
“Nuk është për herë të parë i përfshirë Kurti, kjo është hera e tretë, nga roli i kryeministrit hera e parë, por nuk ka pasur ndonjë sukses të veçantë në radhët e kaluara, nuk do të ketë sukses as tash”, ka thënë Grubi për AP.
Përfshirja e Kurtit në zgjedhjet presidenciale dhe ato parlamentare të vendit fqinj, duke mbështetur koalicionin VLEN – pjesë e të cilit janë edhe eksponentë të Lëvizjes Vetëvendosje – këtë radhë nuk është e para.
Ai edhe më herët kishte mbështetur kandidatin e pavarur shqiptar – të përkrahur nga opozita shqiptare – për president Blerim Rekën, duke vepruar ndryshe nga partia më e madhe shqiptare në Maqedoni të Veriut, BDI-ja.
Po ashtu, edhe në zgjedhjet parlamentare të 2021-së, Kurti kishte mbështetur opozitën shqiptare, përkatësisht koalicionin në mes të Aleancës për Shqiptarët të Ziadin Selës dhe Alternativës së Afrim Gashit.
E përbashkëta e të dyja këtyre kishte qenë se asnjërin rast nuk ka arritur që të ketë sukses. Reka nuk ishte zgjedhur president dhe koalicioni i ASH-së me AAA-në nuk kishte arritur të dilte forcë e parë, pra ta mposhte BDI-në.
Për AP, Grubi ka folur edhe për pritshmëritë që ka partia e tij në zgjedhje. Ai është shprehur i bindur se koalicioni që drejtohet nga BDI-ja, përkatësisht lideri i saj, Ali Ahmeti, do të jetë fituese absolute ndaj koalicionit “VLEN”, që ka mbështetjen e Kurtit.
“Çdo sondazh i joni brendapartiak, i opozitës, i partive politike maqedonase, i komunitetit ndërkombëtar, duke përfshirë edhe organizatat amerikane si IRI… e nxjerrin BDI-në deh Frontin Evropian si fitues absolut të zgjedhjeve. BDI e vetme e fiton të gjithë opozitën, ndërsa me “Frontin Evropian” gjithsesi që pres që dallimi të jetë dyfish në numrin e deputetëve”, potencon ai.
Në zgjedhje, të dyja kampet si “Fronti Evropian” ashtu “VLEN”, kanë edhe kandidatë për president, në zgjedhjet që do të mbahen fillimisht më 24 prill raundi i parë dhe më 8 maj i dyti, së bashku me ato parlamentare.
Nga “VLEN” kandidat është Arben Taravari, aktualisht kryetar i Gostivarit – komunë e banuar me shumicë shqiptare – ndërsa Bujar Osmani, Ministër i Punëve të Jashtme të Maqedonisë së Veriut, është propozuar nga “Fronti Evropian”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
