Lajme

“Ndaj BE-së mund të jemi kritik, por Evropa është kontinenti ynë”


Kryeministri i Kosovës, Albin Kurti, gjatë takimit të tij me Drejtorin e Shërbimit Evropian të Veprimit të Jashtëm (EEAS) të BE-së, Marko Makovec

“Ndaj Bashkimit Evropian mund të jemi kritik, por Evropa është kontinenti ynë kurse BE-ja fati ynë”.

Kështu është shprehur Kryeministri i Kosovës, Albin Kurti, gjatë takimit të tij me Drejtorin e Shërbimit Evropian të Veprimit të Jashtëm (EEAS) të BE-së, Marko Makovec dhe Shefin e Zyrës së BE-së në Kosovë, Tomas Szunyog.

Ky reagim i Kurtit vjen pas deklaratës së Presidentes së Kosovës, Vjosa Osmani, lidhur me çështjen e procesit të vettingut ku ka thënë se s’pajtohet me rekomandimet e raportit të Komisionit Evropian.

Rekomandimet e KE-së thonë se gjatë kohë së hartimit të raportit, Kosova është ende në fazat fillestare të luftës kundër korrupsionit, krimit të organizuar, dhe qëndron dobët sa i përket përgatitjes së një sistemi të Vettingut.

Në këtë takim, siç njoftoi zyra e kryeministrit, është diskutuar edhe për liberalizmin e vizave.

“Kryeministri theksoi se Kosova i ka përmbushur të gjitha kriteret për liberalizim dhe tashmë kaluan tre vite kur Komisioni Evropian ka rekomanduar për herë të dytë liberalizimin e vizave”, thuhet në njoftim.

Po ashtu, Kurti “vuri theksin në përshpejtimin e zbatimit të Marrëveshjes së Stabilizim Asociimit dhe mundësitë për t’u angazhuar bashkërisht në projekte të efiçiencës së energjisë, rritjes së cilësisë së edukimit dhe krijimit të vendeve të punës”.

Kryeministri i Kosovës, Albin Kurti, gjatë takimit të tij me Drejtorin e Shërbimit Evropian të Veprimit të Jashtëm (EEAS) të BE-së, Marko Makovec dhe Shefin e Zyrës së BE-së në Kosovë, Tomas Szunyog.

Në anën tjetër, kryeministri Kurti ka potencuar domosdoshmërinë e rritjes dhe fuqizimit të bashkëpunimit bilateral ndërmjet Kosovës dhe BE-së.

“Me qeverinë tonë të re, me rezultatet e arritura në këta muaj, ne tashmë kemi hyrë në një fazë të re të reformave të cilat do të përshpejtojnë integrimin e Kosovës në BE”, ka thënë Kurti, duke shtuar se në këtë rrugëtim Kosova “do të ecë në partneritet me BE-në”.

Kurse sa i përket zgjedhjeve lokale të mbajtura të dielën e 17 tetorit, “u vlerësuan për organizimin e mirë, transparencën e plotë dhe garën demokratike”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore