Misioni i NATO-s në Kosovë, KFOR-i, “do të vazhdojë të mbajë prezencën e tij fikse” në urën kryesore mbi lumin Ibër duke vazhduar “të kryejë patrullime të rregullta në zonat përreth” edhe pas takimit që kryenegociatori i palës kosovare, Besnik Bislimi, ka pasur selinë e NATO-s në Bruksel me ndihmës Sekretarin e Përgjithshëm të NATO-s për Operacionet, Tom Goffus dhe Komandantin e Operacioneve Civile në Shërbimin e Veprimit të Jashtëm të Bashkimit Evropian, Stefano Tomat.
Goffus e Tomat, sipas një komunikate për media e lëshuar nga Aleanca Veri – Atlantike, NATO, të martën kanë zhvilluar takime të ndara me të kryenegociatorin e palës kosovare, Besnik Bislimi e kryenegociatorin e palës serbe, Petar Petkoviç-in në Bruksel – ku çështja kryesore e diskutuar ka qenë ura kryesore mbi lumin Ibër.
Takimet e ndara në selinë e NATO-s me Besnik Bislimin e Petar Petkoviç-in, u zhvilluan “në margjinat e procesit të dialogut të ndërmjetësuar nga Bashkimi Evropian e të organizuara nga i deleguari i BE-së për dialogun, Miroslav Lajçak”.
KFOR-i ka prani të përhershme në urën mbi lumin Ibër.
Megjithatë javë më parë prania e misionit u shtua, pasi autoritetet e Kosovës mbyllën pesë komuna paralele serbe në veri të Kosovës.
Aksioni u kritikua nga bashkësia ndërkombëtare, e cila i ka bërë thirrje Qeverisë së Kosovës që të mos ndërmarrë veprime të njëanshme dhe të pakoordinuara.
Ekzekutivi kosovar po ashtu është përballur me kritika nga bashkësia ndërkombëtare sepse ka shprehur synimin që ta hapë për qarkullim të automjeteve urën mbi Ibër.
Shtetet e Bashkuara, Bashkimi Evropian dhe KFOR-i janë shprehur kundër hapjes së urës tani. KFOR-i dhe BE-ja kanë kërkuar që kjo çështje të trajtohet në dialogun e Brukselit.
NATO e konfirmon: Me Bislimin e Petkoviç-in diskutuam për çështjen e urës së Ibrit
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
