Nobelistja Narges Mohammadi nis grevën e urisë në burg

Laureatja iraniane e Çmimit Nobel për Paqen 2023, Narges Mohammadi, ka nisur grevën e urisë në burg.

Kështu kanë bërë me dije familjarët e saj.

Mohammadi është aktiviste iraniane për të drejtat e njeriut, e cila aktualisht ndodhet në burg.

Në maj 2016, ajo u dënua në Teheran me 16 vjet burgim për krijimin dhe drejtimin e “një lëvizjeje për të drejtat e njeriut që bën fushatë për heqjen e dënimit me vdekje”.

Në vitin 2022, ajo u emërua në listën e 100 grave të BBC-së.

Gjatë karrierës së saj universitare, ajo ka shkruar artikuj në mbështetje të të drejtave të grave në gazetën studentore.

Dhe vazhdoi të punojë si gazetare për disa gazeta reformiste dhe botoi një libër me ese politike të titulluar “Reformat, Strategjia dhe Taktikat”.

Në vitin 2003, ajo iu bashkua Qendrës Mbrojtëse të të Drejtave të Njeriut, të kryesuar nga laureatja e Çmimit Nobel për Paqe, Shirin Ebadi.

Dhe më vonë u bë nënkryetare e organizatës.

Emri i saj është bërë sinonim i luftës për të drejtat e njeriut në Iran – një betejë që i ka kushtuar pothuajse gjithçka.

Mohammadi ka qenë e burgosur për shumicën e dy dekadave të fundit.

Ajo është dënuar në mënyrë të përsëritur për të qenë zëri i të pazërit, për fushatën e saj të paepur kundër dënimit me vdekje dhe izolimit – të cilin i është dashur të durojë me javë të tëra.

Aktualisht ajo vuan dënimin, e akuzuar për veprime kundër sigurisë kombëtare dhe propagandë kundër shtetit.

Por as qelitë më të errëta të burgut famëkeq Evin në Teheran nuk e kanë shtypur zërin e saj të fuqishëm.

Në një regjistrim audio nga brenda Evin, Mohammadi dëgjohet duke drejtuar thirrjet “grua, jetë, liri” – slogani i kryengritjes së ndezur vitin e kaluar nga vdekja e 22-vjeçares Mahsa Amini në paraburgim, e cila u arrestua pasi dyshohej se nuk e mbante siç duhet shaminë.

Këtë vit, Komiteti Norvegjez i Nobelit vendosi t’i japë Çmimin Nobel të Paqes për luftën e saj kundër shtypjes së grave në Iran dhe luftën e saj për të promovuar të drejtat e njeriut dhe lirinë për të gjithë.

Laureatja e Çmimit Nobel për Paqen 2023, Narges Mohammadi

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.