Nano: 25 maj ditë feste, jo shtetrrethim

Drejtori i Policisë së Shtetit, Gledis Nano në një deklaratë për mediat ka folur për masat që do të merren më 25 maj për finalen e Conference League, e cila do të zhvillohet në stadiumin “Air Albania”, në Tiranë.

Nano tha se të mërkurën nuk do të ketë shtetrrethim në kryeqytet, por “patjetër që do ketë bllokim rrugësh”.

“Këto ditë është thënë që në 25 maj do ketë një shtetrrethim. Dua t’u bëj me dije e të kërkoj mirëkuptim nga qytetarët që data 25 do jetë ditë feste. Mos përhapim panik lidhur me shtetrrethime. Patjetër që do ketë bllokim të rrugëve. Tirana do jetë e bllokuar për ata që duan të vijnë në Tiranë”, theksoi ai.

Nano sqaroi se do të ketë komunikim se cilat rrugë do të bllokohen.

“Unë ju sugjeroj që të mos vinë në Tiranë, kush ka për të ardhur atë ditë. Do të jetë një aktivitet me masa shumë të mëdha. Policia ka sugjeruar dhe do të bëjë bllokimin e rrugëve. Do të kemi komunikime të tjera në vazhdim se cilat rrugë do të jenë të bllokuara”.

Drejtori i Policisë tha se nuk do të lejojnë që një pakicë e vogël tifozësh “të cilët nën efektin edhe të pijeve alkoolike apo adrenalinës që shkakton sporti të prishin imazhin e vendit tonë”.

“Jemi në bashkëpunim me autoritetet e huaja me qëllim identifikimin e këtyre personave dhe masat do jenë profesionale që këto akte të mos ndodhin”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.