Ministrja e Arsimit, Shkencës dhe Teknologjisë, Arbërie Nagavci, ka njoftuar se janë bërë të gjitha përgatitjet për kthim të sigurt të fëmijëve në shkolla, duke shtuar se shkollat “janë institucionet e para që duhet të hapen dhe të fundit që duhet të mbyllen”.

Nagavci, përmes një video mesazhi ka theksuar se është e rëndësishme që të gjithë të jenë të vaksinuar.

“Ministria e Arsimit bashkë me Drejtoritë e Arsimit dhe udhëheqësit e shkollave, i ka bërë të gjitha përgatitjet për kthim të sigurt të fëmijëve tanë në shkolla. Përqindja e vaksinimit në mesin tonë duhet të jetë 100 për qind. Arsimi cilësor mund të ofrohet vetëm në shkolla, prandaj edhe shkollat janë institucionet e para që duhet të hapen dhe të fundit që duhet të mbyllen”, ka thënë Nagavci.

Po ashtu, ministrja Nagavci ka kërkuar nga nxënësit që të respektojnë masat e rekomanduara nga ekspertët shëndetësorë dhe bashkëpunim në mes mësimdhënësve dhe prindërve.

“Të dashur nxënës, ju lutem, respektoni në përpikëri masat e rekomanduara nga ekspertët shëndetësorë për t’u mbrojtur nga COVID-19. Mësimdhënës dhe prindër të nderuar, është shumë e rëndësishme bashkëpunimi në mes të gjithë neve, veçanërisht në këtë periudhë pandemie”, shtoi ajo.

Nërkaq, Ministri i Shëndetësisë, Arben Vitia, në raportimin para Komisionit Parlamentar për Shëndetësi, pati thënë se ekspertët e Institutit Kombëtar të Shëndetit Publik të Kosovës i kanë rekomanduar që të shtyjë fillimin e procesit mësimor.

Megjithatë, Vitia, të enjten e 23 shtatorit do të takohet me Kryetarët e komunave të Kosovës për të diskutuar rreth rishikimit të masave anti-COVID.

Kështu ka bërë të ditur për Albanian Post, Kryetari i Asociacionit të Komunave të Kosovës, Sazan Ibrahimi, i cili tha se në takimin i cili do të fillojë rreth orë 14:00, pjesëmarrës do të jenë edhe drejtorët komunal të shëndetësisë.

“Do të takohemi me ministrin Vitia për të diskutuar mundësimin e lehtësimit të masave anti-COVID, për mundësimin e fillimit të vitit shkollor me prani fizike në shkolla dhe për lehtësimin e masave në fushën e gastronomisë”, ka thënë Ibrahimi.

Ibrahimi, ka thënë se do të insistojnë në kërkesën që qytetarëve t’iu mundësohet hyrja në ambientin e brendshëm në lokale.

Sipas tij, komunat janë të gatshme dhe kërkojnë që fillimi i vitit të ri shkollor të fillojë më 27 shtator.

“Kjo u konkludua në takimin e kolegjiumit të drejtorëve të arsimit në kuadër të Asociacionit të Komunave të Kosovës. Çdo vendim për cilin skenari i zhvillimit të procesit mësimor do të merret nga Task Forca Komunale e Arsimit”, shtoi ai.

Më 31 gusht kanë hyrë në fuqi masat anti-COVID, në të cilat parashihej që fillimi i vitit të ri të shtyhej deri më 13 shtator, por që këto masa janë vazhduar deri më 26 shtator.

Por, ende nuk ka ndonjë vendim nga Ministria e Shëndetësisë lidhur me shtyrjen apo nisjen e fillimit të ri shkollor.