Nagavci deklarohet e pafajshme se posedoi sprej në Kuvend

Ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci është deklaruar e pafajshme lidhur me akuzën se ka kryer veprën penale, “Mbajtja në pronësi, kontroll ose posedim të paautorizuar të armëve”.

Nagavci, është akuzuar se më 21 mars të 2018, gjatë mbajtjes së seancës në Kuvendin e Kosovës, në të cilën ishte hedhur gaz lotsjellës, gjatë kontrollimit nga policia asaj i ishte gjetur një sprej ngjyrë e gjelbër me pjesë spërkatëse të zezë, raporton “Betimi për Drejtësi”.

Pas leximit të aktakuzës nga prokurorja Merrushe Llugiqi, ajo ka sqaruar rrethanat e kësaj vepre penale.

“Në lidhje me veprën penale që më ngarkohet e konsideroj veten të pafajshme, nuk e mohoj se kam pasur sprej përkatës me mbishkrimin American Style, të njëjtin e kam pasur në korridorin e Kuvendit dhe jo në sallën ku zhvillohet seanca”.

“Sido që të jetë veprimet tona atëherë kanë qenë politike si deputete e Kuvendit të Republikës së Kosovës, e kam konsideruar obligim kushtetues dhe përgjegjësi që ta mbroj integritetin dhe sovranitetin e vendit tim”.

Pas kësaj, gjykatësja Krasniqi-Jashanica, e informoi atë për të drejtën e hudhjes se aktakuzës dhe kundërshtimit të provave në afat prej 30 ditësh.

Aktakuza kishte thënë se më 21 mars 2018, e pandehura Nagavci në mënyrë të paautorizuar dhe në kundërshtim me ligjin mbi armët ka mbajtur në posedim sprejin me ngjyrë të gjelbër, me pjesë spërkatëse të zezë me mbishkrimin “NATO American Style”.

Me këtë, Nagavci po akuzohet se ka kryer veprën penale “Mbajtja në pronësi, kontroll ose posedim të paautorizuar të armëve” nga neni 374 paragrafi 1 të Kodit Penale të Republikës së Kosovës, vepër kjo e dënueshme me gjobë deri në 7 mijë e 500 euro ose me burgim deri në pesë vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.