Mustafa paraqet 51 pika kundërshtuese në Apel ndaj dënimit prej 26 vitesh burgim

51 pika janë paraqitur nga avokati i Salih Mustafës, kundër vendimit dënues me 26 vjet burg të shqiptuar ndaj tij nga Gjykata Speciale më 16 dhjetor të 2022.

Nga trupi gjykues është thënë se Mustafa, ka kërkuar nga Paneli i Gjykatës së Apelit të shfuqizojë vendimin dënues ndaj tij dhe të shpallet i pafajshëm, ose të kthehet në rigjykim rasti i tij, ndërsa në rast që konfirmohet vendimi dënues ndaj tij, të ulet lartësia e dënimit.

Ndërsa, në fillim të kësaj seance kryetarja e trupit gjykues të Panelit të Gjykatës së Apelit, paraqiti një rezyme të vendimit të 16 dhjetorit 2022, ku fajtor ishte shpallur Salih Mustafes.

“Mos te përsëriten argumentet e gjykimit të parë, sepse apeli nuk është gjykim i ri, por të paraqiten gabimet e pretenduara gjate procesit të parë”, tha kryetarja e trupit gjykues.

Avokati, Julius Von Bone, ka kërkuar nga trupi gjykues i Mustafës që të jetë kritik ndaj akuzave faktike që po shfaqen në Speciale dhe të mos merren për bazë vetëm dëshmitarët që dëshmuan kundër Mustafës.

“Gabimi në konsiderimin e trupit gjykues që kjo nuk ka rëndësi materiale për përcaktimin e akuzave është i gabuar dhe rezulton në një gabim gjyqësor. Trupi gjykues do të duhej të ishte kritik ndaj këtyre akuzave faktike, në vend të kësaj trupi gjykues vendosi që ato nuk kanë rëndësi materiale për akuzat”.

Sipas tij, askush s’mund t’i ndryshoj faktet që po paraqiten.

“Mbrojtja duhet të ketë mundësi që të mbështetet që ekspozeja faktike e dhënë nga ZPS-ja dhe baza faktike siç paraqitet në aktakuzën e konfirmuar, do të mbesin baza faktike deri në përfundim të procesit gjyqësor”.

“Dikush, askush s’mund ta ndryshoj këtë bazë faktike në mënyrë të tillë që t’i shërbejë provave të veta. Palët duhet t’i shërbejnë drejtësisë dhe jo çështjes së tyre, megjithatë kjo është faktikisht çfarë ka bërë ZPS-ja”, deklaroi ai.

Më 16 dhjetor, ish-komandantit të Ushtrisë Çlirimtare të Kosovës, Salih Musafës, i është dhënë dënimi prej 26 vjet burgim nga nga Trupi Gjykues në Dhomat e Specializuara të Kosovës në Hagë.

Mustafa, i cili njihet ndryshe edhe si komandant Cali u shpallë fajtor në disa pika – “torturë si krime lufte, ndalim arbitrar si krim lufte, vrasje e paligjshme si krim lufte”.

Dënimi, nga 35 vjet sa kishte kërkuar prokuroria, është dhënë për 26 vjet burgim.

Mustafa është shpallur i pafajshëm për pikën e aktakuzës “trajtim mizor”.

Duke qenë se Mustafa u shpallë fajtor për më shumë se një vepër penale, trupi gjykues ka përcaktuar fillimisht nga një dënim për vete për secilën vepër penale për të cilën është dhënë vendim fajësie.

E më pas Kryegjykatësja, Mappie Veldt-Foglia, ka shqiptuar dënimin në tërësi me 26 vjet heqje lirie.

“Trupi gjykues ka përcaktuar dënim me 10 vjet burgim për krimin e luftës ndalim arbitrarë, dënim me 22 vjet burgim për krimin e luftës së torturës dhe dënim me 25 vjet burgim për krimin e luftës së vrasjes së paligjshme”.

Dënimi ndaj Salih Mustafës nga Gjykata Speciale është i pari lidhur me hetimet për krime lufte në Kosovë.

Për çka akuzohej Salih Mustafa?

Sali Mustafa, i njohur me nofkën “komandat Cali”, akuzohej për ndalim arbitrar, trajtim mizor, torturë dhe vrasje të paligjshme të shqiptarëve.

Këto krime dyshohet se ishin kryer në kompleksin e ndalimit në Zllash në Kosovë, në prill të vitit 1999.

Ndryshe, aktakuza ndaj Mustafës ishtë konfirmuar më 12 qershor 2020.

“Aktakuza e konfirmuar përcakton se afërsisht midis 1 prillit 1999 dhe 19 prillit 1999, në një kompleks ndalimi në Zllash, Kosovë, u kryen krimet e ndalimit arbitrar, trajtimit mizor dhe të torturës kundër të paktën gjashtë personave”.

Gjithashtu, në aktakuzë thuhej se në një datë midis 19 prillit 1999, ose rreth kësaj date, dhe rreth fundit të prillit 1999, në atë vendndodhje u vra një i ndaluar.

Ndërkaq, Mustafa, i pyetur se si deklarohet për akuzat, kishte thënën “i pafajshëm në të gjitha pikat që mi ngarkon kjo Zyre e Gestapos”, duke bërë referencë për shërbimin sekret policor në kohën e Gjermanisë naziste.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.