Mustafa: Disa po bëjnë politika ditore me emrin dhe figurën e Rugovës për interesa të tyre

Ish-kryeministri i Kosovës, Isa Mustafa, nëpërmjet një postimi në platformën sociale, Facebook, ka potencuar se në shënimin e 25 vjetorit të Çlirimit të Kosovës disa persona – pa e cekur se kush – e kanë shfrytëzuar për ta sulmuar dhe denigruar figurën e ish-presidentit të Kosovës, Ibrahim Rugovës, njeriu i cili në vlerësimin e tij “vuri themelet e çlirimit dhe të pavarësisë”.

“Për Rugovën nuk folën ata që do duhej të flisnin. Disa kanë vdekur, disa nuk u ftuan të flasin, disa nuk janë aty ku është mikrofoni e disa po bëjnë politika ditore me emrin dhe figurën e tij për interes të tyre”, ka shkruar fillimisht ai.

Rugova, sipas tij, nuk ka nevojë të mbrohet nga askush, meqë ai mbrohet dhe madhërohet nga vepra e tij.

“Nuk shkruhet historia duke e cilësuar Rugovën si paranojak, sepse paranojakët nuk krijojnë vepra kombëtare, siç i krijoi Rugova. Aq më pak nuk thuhet e vërteta nëse ia mvesh dikush, që nuk e ka dashur Rugovën asnjëherë, që ai ka kërkuar azil në Gjermani”.

“Unë kam qenë në Bon, si anëtar i qeverisë në ekzil, kur ka ardhur Rugova me familje të ngushtë nga Italia në maj të vitit 1999. Qeveria jonë ka qenë e interesuar që  Rugova të qëndrojë aty për një kohë dhe të punojmë së bashku deri sa të kthehemi në Kosovë”, ka shtuar ai.

Në atë kohës, siç thotë Mustafa, Qeveria e Kosovës në ekzil dhe jo ajo gjermane ka mbuluar shpenzimet e qëndrimit dhe të aktivitetit të tij në Gerjmani.

“Askush nuk e ka menduar as përmendur azilin. Së fundmi azil nuk kishim kërkuar asnjëri nga ne që qëndruam 9 vite në ekzil, (as dr. Bujar Bukoshi, as dr. Muhamet Bicaj, as Halit Muharemi, as unë).  Pas disa ditësh Presidenti Rugova u kthye në Itali. Qeveria dhe populli italian u treguan atëbotë mikpritës dhe më të kujdesshëm ndaj Rugovës”, ka përfunduar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.