Lajme

Musliu e pyet Kusarin për përgjimet: Me koordinim apo pa koordinim?


Ganimete Musliu dhe Mimoza Kusari Lila.

Deputetja e Partisë Demokratike të Kosovës, Ganimete Musliu, ka kërkuar që seanca e Kuvendit të Kosovës të ndërpritet pas publikimit të audio-incizimit në të cilin Kusari-Lila, e pranon se ka biseduar në telefon me Milan Radoiçiç-in, politikanin i cili është sanksionuar nga SHBA-ja.

Musliu, e ka pyetur Kusari-Lilën se “me koordinim apo koordinim?”.

“Unë mendoj se duhet me ndërpre seancën sot. E sot, duhet me dhanë llogari me koordinim a po koordinim? Se sot po del që me shumë koordinim. LVV-ja koordinohet me Listën Serbe kundër shtetit të Kosovës. Me Radoiçiç-in”.

“Mos e ulni more kryet sot? Mos e ulni. A me koordinim a po koordinim po ju pyes? Se këtu po del që me koordinim keni dal kundër të gjithë atyre që kanë bërë diçka për këtë vend”, tha Musliu.

Edhe deputetja nga radhët e Lidhjes Demokratike të Kosovës, Doarsa Kica Xhelili, ka reaguar pas publikimeve të përgjimeve.

Ajo në rrjetin social ‘Facebook’ ka shkruar se “nuk qenka më pyetja Me a Pa koordinim. Pyetja qenka me kënd”.

Përgjigjet e publikuara nga mediumi Nacionale, e nxjerrin Kusari-Lilën në një bashkëpunim me Simiç-in i cili thotë se ajo duhet ta kujtojë që nga fillimi kanë qenë partnerë dhe se Radojiçiç është konstruktiv për Kosovën.

“Unë deklarohetm pas orës 14:00, se jam brenda në seancë dhe ka shumë zhurmë”, tha Kusari-Lila për Albanian Post, në përgjigjen e saj të shkurtër.

Incizimet e publikuar janë bërë në qershor të vitit 2022.

Kurse, biseda mes Kusari-Lilës e Slavko Simiç-it ishte bërë në zyrën e shefes së Grupit Parlamentar të Vetëvendosjes.

Simiç, në bisedë dëgjohet duke i thënë Kusari-Lilës se që nga fillimi kanë pasur raport partnerësh e që këtë shefja e Lëvizjes Vetëvendosje nuk e kishte mohuar.

Në bisedë Simiç i thotë Kusari-Lilës, “ti e din që unë të kam lidhë me Millanin, keni biseduar rreth 30-40 minuta për gjetjen e ndonjë zgjidhje”, Kusari-Lila i thotë se “dy tre minuta”.

Pas kësaj Simiç thotë se, “një herë kemi biseduar më gjatë, ku kemi folur për energjinë në Veri, a e mban mend. Kemi provuar të gjejmë zgjidhje dhe të ndërtojmë raport partnerësh dhe disa vendime që i marrim bashkë me të, nuk mundet të ndikoj as Vuçiç”.

Kusari-Lila e pyet se “kush është kryesori Rakiç a po?”, Simiç përgjigjet duke thënë se “Milani është kryesori, po çfarë Rakiç, i cili është vetëm kryetar i Listës Serbe dhe anëtar i Qeverisë, por kur të vjen puna për të marrë vendime, për këto sende nuk ka nevojë as të më pyes sepse t’i kam shpjeguar kur kemi biseduar”.

Ai shton se, “njeriu nuk e ka merituar aspak tretgmanin që i është bërë, duke e futë në listën e ndalimit, ndërsa shefja e grupit të VV e pyet se “pse po më thua mua?”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore