Për ministrin e Financave, Hekuran Murati, pakoja e re e ndihmesës që rrjedhimisht parasheh shpërndarjen e një shume prej 100 eurosh për punëtorët e sektorit publik, privat, studentët si dhe për pensionistët mund të mos zgjidhin shumë probleme të familjeve kosovare, por mund të jenë një ndihmesë në vete.
“Ne kuptojmë që 100 euro mund të mos jenë shumë dhe mund të mos zgjidhin shumë probleme, por shumicën prej familjeve i bie që në atë familje dikush mund të jetë student dikush të jetë pensionist dhe dikush mund të punojë, pra mesatarisht një familje mund të përfitojë 200 deri në 400 euro varësisht se sa persona janë të angazhuar”, ka thënë Murati gjatë raportimin në Komisionin Hetimor për Buxhet, Punë dhe Transfere.
Ai në vazhdimësi duke arsyetuar pakon e re të ndihmesës e miratuar së fundmi nga Qeveria e Kosovës, ka bërë të ditur se edhe shtetet si Franca dhe Gjermani, kanë paraparë ndihmesa të tilla për qytetarët e tyre.
“Kemi rastin e Francës që në vitin e kaluar ka bërë një shpërndarje të tillë pra nga 100 euro për familje të cilat kanë të hyra nën vlerën 2 mijë euro mujore, së fundi kemi një vendim nga shteti gjerman, por që ende nuk ka filluar së implementuar”.
Në anën tjetër Murati ka arsyetuar edhe mos-mbështetjen e Qeverisë së Kosovës ndaj idesë së tërheqjes së një shume të caktuar nga Trusti.
“Tërheqja e trustit nuk ndihmon shumicën e familjeve që janë në nevojë sepse në ato familje nuk është se punojnë në sektor të formalizuar apo ndoshta edhe kanë kursime të mjaftueshme, pasi që pagat e tyre janë të ulëta”, ka shtuar ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
