![](https://albanianpost.com/wp-content/uploads/2024/02/1x-1.jpg)
Mungesa e minutave për Lionel Messi-n gjatë ndeshjes miqësore të Inter Miami në Hong Kong me një skuadër vendase tani është kthyer në një rast politik.
“Organizatori i ndeshjes miqësore ishte zotuar që Lionel Messi të luante të paktën 45 minuta”, tha ministri i sportit i Hong Kongut. Kapiteni i skuadrës kampione të Botës, Argjentina, i cili zyrtarisht vuan nga një dëmtim, kishte qëndruar në stol gjatë gjithë kohëzgjatjes së ndeshjes së fituar 4-1 nga amerikanët.
Rreth 40 mijë spektatorë gjatë takimit filluan të brohorisnin duke kërkuar kthimin e parave që kshin paguar për të parë Messi-n në fushë.
Dhe britmat u shtuan deri në fishkëllimën e fundit, kur anglezi David Beckham, bashkëpronar i klubit të Miami, u pushtua nga zhurmat teksa u përpoq të falënderonte turmën.
Qeveria e Hong Kongut lëshoi dy deklarata të njëpasnjëshme, duke thënë se ishte “jashtëzakonisht e zhgënjyer” dhe duke kërcënuar se do të tërhiqte 1.9 milionë euro fonde publike nga organizatori i ngjarjes, “Tatler Asia”, një media e specializuar në modën luksoze dhe stilin e jetës.
“Një nga kushtet kryesore të marrëveshjes sonë të financimit me ‘Tatler Asia’ ishte që Messi të merrte pjesë në ndeshje për të paktën 45 minuta”, tha Kevin Yeung , sekretari për kulturën, sportin dhe turizmin e Hong Kongut, në një konferencë.
“Para fillimit të ndeshjes, organizatori ‘Tatler Asia’ përsëriti se Messi do të luante në pjesën e dytë, shpjegoi ai.
Yeung, i cili ndoqi ndeshjen në stadium me zyrtarë të tjerë, duke përfshirë shefin ekzekutiv të Hong Kongut, John Lee, siguroi se qeveria lokale ishte përpjekur të negocionte me organizatorin kur 36-vjeçari nuk u shfaq në fushë në fillim të ndeshjes.
Negociatat ngecën dhjetë minuta para përfundimit të ndeshjes, pasi “zgjidhjet” si shfaqja e Messi-t në fushë për tu përshëndetur me tifozët dhe për të marrë trofeun u refuzuan.
Ministri shtoi se qeveria e Hong Kongut do të marrë një vendim nëse do të tërheqë ndihmën e planifikuar financiare pas shqyrtimit të fakteve me organizatorin e ngjarjes.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com