Muja: Veç vendeve të punës edhe paga mesatare është rritur “nominalisht më shumë” që nga ardhja e Qeverisë Kurti

Deputeti nga radhët e Lëvizjes Vetëvendosje dhe kryetari i Komisionit për Buxhet, Punë dhe Transfere në Kuvendin e Kosovës, Armend Muja, nëpërmjet një postimi në llogarinë e tij në “Facebook”, ka thënë se në tri vitet e fundit Kosova ka përjetuar një “rritje të ndjeshme” të vendeve të punës.

Deputeti Muja, duke marrë për bazë të dhënat nga Administrata Tatimore e Kosovës (ATK) dhe Agjencia e Statistikave të Kosovës (ASK), ka thënë gjithashtu se edhe paga mesatare është rritur “nominalisht më shumë” që nga ardhja e Lëvizjes Vetëvendosje në pushtet nën drejtimin e Albin Kurtit.

“Tregu i punës dhe pagat: në qershor 2023 kemi 405,887 vende pune të regjistruara në Administratën Tatimore, 63,206 më shumë se para ardhjes së Qeverisë Kurti II. Të dhëna të përafërta ofrohen edhe nga ASK LFS. Rroga mesatare bruto e paguar në qershor 2023 ishte 584.5 € apo 105.1 € më shumë sesa në qershor 2020 (479.4 €)”, ka shkruar ai.

“Kjo nuk është për të thënë që Kosova nuk ka sfida në tregun e punës e që punëtorët paguhen mirë. Kjo është për të thënë që në tri vitet e fundit përmes aktivitetit të shtuar ekonomik, formalizimit dhe incentivave strukturore kemi rritje të ndjeshme të vendeve të punës”.

Kosova vazhdon të ketë probleme të mëdha ekonomike. Opozita po e akuzon ekzekutivin për politika të gabuara ekonomike, derisa dhjetëra mijëra qytetarë, kryesisht të rinj të papunë e profesionistë të dëshpëruar, po ia kthejnë shpinën vendit të tyre për të nisur jetë të re në shtetet perëndimore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.