MSH: Masat e reja antiCOVID-19, janë në përputhje me situatën epidemiologjike në Kosovë

Masat e reja antiCOVD në Kosovë, të miratuar më 21 janar, u kritikuan nga njohësit e shëndetësisë dhe partitë opozitare.

Këto të fundit janë në kundërshtim me rekomandimet e Organizatës Botërore të Shëndetësisë.

Sipas OBSH, kufizimi i udhëtimeve nuk ka sjellë rezultat pozitiv në parandalimin e përhapjes së pandemisë, dhe kontribuon vetëm në stresin ekonomik dhe atë social.

Thirrjet e fundit të OBSH-së janë që dëshmia e vaksinimit kundër COVID-19 mos të kërkohet për udhëtarët.

Zyrtari për Komunikim me Publikun në Ministrinë e Shëndetësisë, Faik Hoti, në një intervistë me shkrim për Albanian Post sqaron se masat e reja antiCOVID i përshtaten situatës epidemiologjike në Kosovë.

“Secili shtet ndërmerr masa kundër COVID-19, bazuar në situatën e vet epidemiologjike indikatorët që e masin shkallën e përhapjes së infeksionit, projeksionet për ditët apo javët në vijim dhe karakteristikat e tjera ndërlidhur me situatën”, ka thënë Hoti për AP.

Pavarësisht që këto masa nuk thuhen njëjtë në udhëzuesin e OBSH-së, Hoti e kundërshton një gjë të tillë.

“Asnjë nga masat aktuale nuk është masë që nuk është zbatuar në shtete të tjera, diku më herët e diku më vonë dhe që të gjitha janë të bazuara në udhëzues të OBSH e ECDC”.

Ai bën të ditur tutje se, “në Kosove ekziston Zyra e OBSh-së dhe institucionet e Kosovës, kanë zbatuar që nga fillimi rekomandimet e kësaj organizate dhe të ECDC dhe konsultohen në vazhdimësi me to”.

Sipas tij, rekomandimet e OBSH-së janë vetëm orientim i vendimeve të shteteve.

“Rekomandimet e OBSH-së janë të orientuara për t’iu dhënë udhë –orientim vendimeve të shteteve, por shtetet i marrin vet vendimet bazuar në karakteristikat që i kanë dhe situatën epidemiologjike që e kanë”, pohon Hoti.

Gjithashtu, bazuar në masat e reja ekzekutivi ka kërkuar dozë të tretë për shtetasit e huaj, Hoti këtë e arsyeton si heqje barriere ndaj tyre.

“Kërkesa për dozë të tretë për shtetasit e huaj është bërë që atyre t’u hiqen barrier të tjera si testi PCR shembull, ku në shtete si SHBA testi PCR negativ kërkohet pavarësisht nëse i keni 3 doza; derisa ne Kosove ata që nuk i kanë 3 doza, mund të hyjnë edhe me 2 doza dhe PCR test”.

Por doza e tretë nuk është e obligueshme edhe për banorët e Kosovës, ai thotë për këtë se, “në disa shtete prej nga vijnë shtetasit e huaj në Kosovë janë të kategorizuar në shtete me rrezik të lartë”.

“Prandaj është e kuptueshme, që një numër prej shtetasve të huaj mund të jenë nga këto shtete, sikur që është normale që secili shtet ka një lloj lehtësimi për shtetasit e vet, të cilëve megjithatë u kërkohen dy doza të vaksinës kur hyjnë Kosovë, ose një dozë, test PCR dhe 7 ditë karantinim”.

Kryetarja e Komunës së Preshevës, Ardita Sinani, pas hyrjeve në fuqi të masave të reja anti-COVID nga Qeveria e Kosovës, ka treguar se kanë pasur efekt vështirësues ndaj lëvizjes së lirë të qytetarëve të Luginës së Preshevës që vinë në Kosovë.

Vështirësinë më të madhe, shpjegoi ajo, del ta kenë studentët preshevas të cilën ndjekin studimet në Kosovë, dhe gjendjes ekonomike me të cilën nuk mund të mbulojnë financiarisht testin RT-PRC për çdo herë që hyjnë në Kosovë.

Por, pavarësisht kësaj, zyrtari për komunikim me publikun në ministrinë e Shëndetësisë thotë se nuk do të ketë lehtësim të masave.

“Masat janë çdo ditë në shqyrtim dhe siç është bërë e ditur edhe nga MSH, nëse gjatë kësaj jave, rastet me COVID-19, nuk çojnë në ngarkesë të pa përballueshme spitalore dhe nuk rrisin ndjeshëm numrin e të spitalizuarve, mund të pritet të rishqyrtohen ka fundi i javës”.

“Deri atëherë masat vlejnë si për qytetarët e Kosovës si për shtetasit e huaj”, bën të ditur Hoti.

Kosova po vazhdon të përballet me rritjen e rasteve me COVID-19. Vetëm më 25 janar në Kosovë kanë humbur jetën dy persona dhe janë shënuar dy mijë e 500 persona të infektuar me COVID-19.

Kosova ka nisur fushatën e vaksinimit kundër COVID-19 në mars të vitit 2021.

Prej atëherë janë dhënë mbi 1.7 milion doza të vaksinës.

Deri më tani, me dy doza të vaksinës janë imunizuar 799 mijë e 939 persona apo 44.5 për qind e popullsisë.

Qytetarët në Kosovë mund të marrin vaksina të kompanive: Pfizer/BioNTech dhe AstraZeneca.

Doza përforcuese e vaksinës mund të merret pas tre muajve të marrjes së dozës së dytë.

Qeveria e Kosovës ka miratuar të premten, 21 janar, masa të reja për luftim të pandemisë.

Sipas vendimit të Qeverisë, qytetarët që hyjnë në Kosovë duhet të jenë të vaksinuar plotësisht dhe të kenë edhe dozën përforcuese.

Ata që nuk kanë dozën përforcuese, duhet të kenë test negativ të llojit PCR, të vlefshëm për 48 orë.

Kufizimi i qarkullimit do të aplikohet nga ora 22:00 deri në orën 05:00.

Bizneset e gastronomisë mund të zhvillojnë aktivitetin e tyre nga ora 05:00 deri më 21:00.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.