Shumë nga njerëzit që kanë lindur dhe janë rritur në Kosovë e shohin perëndimin si një opsion më të mirë për ta zhvilluar karrierën e tyre.
Ndonëse më rrallë, ka edhe raste të kundërta.
Persona të caktuar vendosin që tërë diturinë e akumuluar ndër vite t’ia dhurojnë origjinës së tyre.
Kështu ka ngjarë edhe me artisten, Kaltrina Rrustemi, e cila ka lindur dhe është arsimuar në Zvicër, veç se talentin dhe dashurinë për artin, ka vendosur ta prezantojë pikërisht në Kosovë.
Së fundmi, Kaltrina ka hapur ekspozitën e saj personale në Galerinë e Ministrisë së Kulturës, të titulluar “Mrena”, derisa njëkohësisht ajo ka botuar edhe librin e saj me titull “Jashtë”, të publikuar në tri gjuhë: shqip, anglisht dhe frëngjisht.
Por, çfarë fshihet pas këtyre dy titujve, që në përshtypje të parë mund të lënë shije kontraversiteti? – Për Albanian Post, ajo rrëfen se gjithçka i referohet jetesës së saj në mes të Zvicrës dhe Kosovës.
“Vendosa të jetoj ‘mrena’ dhe këtë e kam shprehur përmes ekspozitës. Prandaj, kam dashur t’i kushtoj vëmendje dhe të krijoj punime të reja duke qenë këtu dhe duke u inspiruar nga jeta këtu, për të krijuar diçka që mundet të flasë përmes veprave të artit për këtë aktualitet mes diasporës dhe të jetuarit brenda shtetit. Por, unë vij nga ‘jashtë’, dhe eksperiencën time, lindjen e rritjen larg Kosovës, e kam shprehur përmes shkronjave në librin e botuar”, thotë Kaltrina.
Kush më mirë sesa Kaltrina do të dinte ta bënte dallimin në mes të një shoqërie të izoluar ndër dekada si kosovarët, si dhe një shteti më diversitet të plotë dhe liri absolute siç e gëzojnë zviceranët – sipas saj, dallimet janë të theksuara.
“Mund të them që mënyra e jetës është shumë ndryshe. Së pari duke filluar nga mjedisi e shteti – të rriturit në Zvicër të mundëson të zhvillohesh krejt ndryshe nga ajo që të mundëson Kosova. Ndoshta, kryesisht dallimi është tek institucionet dhe shteti që është shumë i fortë atje, kurse këtu është e kundërta, mbështetesh në njerëzit përreth”, thotë artistja.
“Kryesisht, është diçka më serioze në Zvicër, kurse këtu në Kosovë unë personalisht e gjej një liri, që si person mund t’i thyej rregullat më lehtë, rregullat brenda meje, të lirohem, të gjej veten dhe të jem personi që dua të jem. Kurse në Zvicër jam person më formal dhe më zyrtar, edhe shoqëritë atje, janë më zyrtare, ka më pak spontanitet”, thotë ajo.
Kaltrina, e cila me art merret që nga viti 2008 dhe ka përfunduar tri shkolla arti në Evropë bashkë me studimet master, ka pasur rastin që punimet e saj përgjatë kohës së studimeve, t’i ekspozonte nëpër galeri të vogla, mes Francës dhe Zvicrës.
Teatri, skenografia si dhe të shkruarit, mbetet fokusi i saj kryesor në sferën e artit. Artistja ka folur për konceptin dhe mesazhin që tenton të dërgojë tek audienca, përmes ekspozitës dhe librit të saj tashmë të botuar.
“Jam shumë e kënaqur sepse kam arritur të krijoj vepra të sinqerta dhe ky vit më ka mundësuar që të izolohem brenda meje dhe t’i gjej krejtësisht ndjenjat e mija personale. Çfarë kam ndjerë kur kam ardhur në Kosovë? Çfarë po kërkoj? Ka pyetje shumë filozofike që kanë ardhur prej kësaj. Dëshira ime është që përmes këtij libri dhe kësaj ekspozite t’u jap mundësinë të tjerëve, të shohin një rrugëtim të kësaj eksperience në diasporë, mendoj se duhet të flitet për to”, thotë ajo.
Gjithsesi, kjo ngjarje artistike s’është e para në Kosovë për Kaltrinën, pasi që në bisedë e sipër, ajo na ka treguar se kontakti me komunitetin artistik në Prishtinë kishte nisur që nga viti 2019 – kur ajo kishte krijuar një ‘work-shop’ në bashkëpunim me Fakultetin e Arteve të Gjenevës si dhe Fakultetin e Arteve të Prishtinës.
Qëllimi ishte bashkimi dhe shkëmbimi i ideve në mes të studentëve kosovarë dhe atyre zviceranë, derisa i njëjti ishte mbajtur në hapësirat e TermoKiss – që prej atëherë, ajo thotë të kishte vënë re interesin e madh të audiencës shqipfolëse mbi artin në përgjithësi.
Gjithsesi, për të gjithë artdashësit ekspozita “Mrena” e artistes Kaltrinë Rrustemi, do të qëndrojë e hapur deri më 16 shtator të këtij viti.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
