MPJD: Tri familje nga Kosova ishin në zonën e tërmetit

Numri i viktimave nga tërmeti në Turqi aktualisht është mbi 5 mijë.

Institucionet e Kosovës kanë bërë të ditur se në mesin e viktimave nuk ka asnjë shtetas të Kosovës.

Por, nga Ministria e Punëve të Jashtme dhe Diasporës kanë thënë se kanë arritur t’i identifikojnë dhe kontaktojnë tri familja nga Kosova.

Gjithashtu edhe një ekip të mundësve kosovarë, të cilët kanë qenë duke qëndruar në zonën e goditur nga tërmeti, mëngjesin e 6 shkurtit.

“Me qytetarët që kanë qenë atje në kohën e tërmetit, ambasada e Republikës së Kosovës në Ankara është në komunikim dhe e gatshme për t’i ndihmuar për kthim në Kosovë, apo në ndonjë formë tjetër”, thanë nga MPJD-ja për Radio Evropën e Lirë.

Edhe Ministria për Evropën dhe Punët e Jashtme në Shqipëri ka konfirmuar se nga të dhënat e deritanishme, nuk ka asnjë shqiptar të lënduar apo të vdekur nga tërmeti që goditi Turqinë, por edhe në pjesën e Sirisë.

“Ambasada jonë në Turqi ka kontaktuar disa familje shqiptare, përmes autoriteteve turke, dhe ka konfirmuar se janë shëndosh e mirë”, kanë thënë nga kjo ministri.

Ambasadori i Shqipërisë në Ankara, Kastriot Robo, u shpreh se prania e shqiptarëve në zonat që u goditën nga tërmeti është e limituar në krahasim me rajonet e tjera të Turqisë.

Kurse, ambasadori i Serbisë në Turqi, Zoran Markoviç, ka konfirmuar për Radio Televizionin e Serbisë se 20 shtetas të këtij vendi kanë qenë në rajonin e goditur nga tërmeti në Turqi.

Markoviç u shpreh se nuk ka informacione për ndonjë shtetas serb të vdekur apo të lënduar.

“Sa u përket qytetarëve tanë, ne nuk kemi asnjë informacion, as zyrtar dhe as jozyrtar, që dikush të ketë vdekur apo të ketë qenë në mesin e të lënduarve. Jemi në kontakt me qytetarët tanë që ndodhen në zonën e Gaziantepit. Nuk ka shumë, por me secilin prej tyre jemi në kontakt personal”, tha ai.

Ministria e Punëve të Jashtme е Maqedonisë së Veriut bëri të ditur se nëntë shtetas të këtij vendi ndodheshin në zonën e goditur nga tërmeti në Turqi – dy prej të cilëve u lënduan.

Bëhet fjalë për një mësimdhënës dhe tetë nxënës të shkollave të mesme të Gostivarit, të cilët po qëndronin atje në kuadër të një programi mësimor.

Dy nxënës u lënduan  njëri prej tyre lehtë, ndërsa tjetri iu nënshtrua një intervenimi kirurgjik, si pasojë e një frakture.

Ministria e Jashtme tha se i gjithë grupi pritet të kthehet në Maqedoninë e Veriut.

Sipas saj, në Turqi nuk ka qytetarë të tjerë të Maqedonisë së Veriut që janë në rrezik ose që kanë nevojë për ndihmë.

Ndërsa për një shtetas të Bosnje e Hercegovinës dyshohet se është zënë nga rrënojat e njërit prej shumë objekteve të rrëzuara nga tërmeti në qytetin Mallatja të Turqisë.

Kështu tha për mediat konsulli i Bosnje e Hercegovinës në Stamboll, Sinisha Mihailloviç.

Duke shtuar se “nuk ka informacione për shtetas të tjerë të këtij vendi që mund të jenë lëndruar ose të kenë vdekur nga tërmeti”.

Autoritetet e Kroacisë, në anën tjetër, konfirmuan se dy qytetarë kroatë janë lënduar si pasojë e tërmetit.

Ministri për Punë të Jashtme dhe Çështje Evropiane i Kroacisë, Gordan Gërlliq, tha se të lënduarit janë jashtë rrezikut për jetën.

Në Mal të Zi, autoritetet konfirmuan se asnjë qytetar i tyre nuk ka pësuar nga tërmeti.

Tërmeti që goditi Turqinë, kishte fuqi prej 7.8 shkallësh të Rihterit.

Epiqendra e tërmetit ishte rreth 26 kilometra nga qyteti Nurdagi dhe rreth 33 kilometra larg qytetit Gaziantep, tha Shërbimi Gjeologjik amerikan.

Njëri nga vendet që ka ofruar ndihmë për popullin e Turqisë është edhe Kosova.

Nga krerët institucionalë është thënë se Kosova ka gatishmëri që të ndihmojë.

Presidentja e Kosovës, Vjosa Osmani, shkroi në Twitter se ndihma do të ofrohet përmes dërgimit të trupave të Forcës së Sigurisë në Turqi, nga ana tjetër opozita ka kërkuar krijimin e një fondi emergjent për ofrimin e ndihmave të nevojshme humanitare.

Nga Turqia të hënën ishte thënë se afër 9 mijë persona po marrin pjesë në operacionet e shpëtimit.

Osmani e Kurti i ofruan ndihmë Turqisë – por si dhe sa mund ta ndihmojë Kosova popullin turk?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.