Moti i keq, policia ngre grupe drejtimi nëpër qarqe

Policia e Shtetit ka ngritur grupe drejtimi në të gjitha qarqet për t’iu ardhur në ndihmë drejtuesve të automjeteve dhe qytetarëve nga moti i keq me reshje shiu të dendura.

Për këtë janë angazhuar shërbimet e Policisë Rrugore, ato të Rendit dhe të Ndërhyrjes së Shpejtë.

Njoftimi zyrtar i autoriteteve bën me dije se po mbahen kontakte me pushtetin vendor dhe me firmat kontraktore.

Kjo, për pastrimin e atyre segmenteve në të cilat ka rënie inertesh.

“Të gjithë inspektorët e Policisë në zona ndodhen në zonat e tyre dhe janë në kontakt me administratorët e njësive administrative dhe me kryepleqtë e fshatrave, për t’iu ardhur në ndihmë në rast nevoje”, thekson policia.

Sa i takon vështirësisë së qarkullimit të automjeteve, Policia Rrugore ka rritur prezencën në rrugë dhe monitorimet me mjetet inteligjente, në të gjithë vendin.

Një apel, autoritetet, e patën edhe për të gjithë drejtuesit e automjeteve dhe motomjeteve.

Kjo, që të respektojnë me rigorozitet sinjalistikën rrugore dhe të moderojnë shpejtësinë, pasi në disa akse rrugore ka prezencë të ujit në rrugë dhe rënie inertesh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.