Lajme

Molliqaj – Qeverisë: Udhëzimet për përdorim të qebeve, protestën kanë me pas si përgjigje


Lideri i Partisë Socialdemokrate, Dardan Molliqaj.

Lideri i Partisë Socialdemokrate, Dardan Molliqaj, pas rikthimit të reduktimeve me energji elektrike ka paralajmëruar protestë ditëve në vijim, derisa ka theksuar se Kosovës iu kthyen reduktimet pas afro 15 vitesh.

Kështu është shprehur Molliqaj përmes një shkrimi në rrjetin social ‘Facebook’.

“Terri sot nuk është sikur ai i viteve të pas luftës. Na vjen me shije të propagandës: terri është i barabartë për të gjithë”.

“Kosovës iu kthyen reduktimet pas afro 15 vitesh. Reduktime verës. Nëse dikush iu tregon se Qeveria s’ka faj, meqë kriza e çmimeve është globale, mos e kundërshtoni, vazhdojeni arsyetimin. Jo vetëm qe kriza është globale dhe e shkaktuar nga lufta e Ukrainës. Vetë lufta në Ukrainë është shkaktuar për t’i ngritur çmimet, ashtu që pas ngritjes së çmimeve Qeveria Kurti të ngulfatet nga brenda dhe të rrëzohet”, ka shkruar Molliqaj.

Nga gjithë situata e krijuar, sipas kreut të PSD-së qeveria do të marrë vetëm një përgjigje.

“Nëse asgjë nuk bjerë nga gjithë këto ngritje, kjo mungesë qeverinë e ka adresë. Diçka duhet me ra këtu, borxh nuk iu kemi. Udhëzimet për përdorim të qebeve, protestën kanë me pas si përgjigje”.

Ai madje ka kërkuar llogari nga Qeveria për të treguar se kush po përballet me reduktime, meqë po e quajnë krizë globale.

“Si bëhet që Shqipëria e ka shpenzimin më të madh verës, por atje s’ka reduktime. Pse nuk ka reduktime në Maqedoni, në Mal te Zi ose n’Serbi? Apo të gjithë janë pjesë e komplotit imperialist të bashkuar kundër Albinit?!”.

Molliqaj, shtoi se kjo qeverisje është duke i ofruar vetvetes ditë të vështira.

“Qeverisja dorështrënguar nuk është as e majtë as zhvillimore. Këta i ruajnë paratë për ditët e zeza kur vetë ndihen të rrezikuar. Dhe pas secilit problem presin, ka edhe më keq. Paradoksalisht, duke bërë kështu po ia ofrojnë vetes ditët e vështira”.

“Inflacioni në Kosovë është sikur në gjendje lufte. Qeveria rrinë e strukur. Energjia është shtrenjtuar. Tash edhe reduktime. Shpejt pritet ngritja tjetër e energjisë. Çmimet e mallrave pastaj”.

Më 14 gusht, Kompania për Distribuimin e Energjisë në Kosovë KEDS, ka njoftuar se Operatori i Sistemit, Transmisionit dhe Tregut të energjisë elektrike të Kosovës (KOSTT) ka kërkuar që të fillojnë kufizimet e energjisë elektrike.

Siaps njoftimit të vonë të së dielës, thuhet se KEDS ka pranuar urdhëresë nga Qendra Nacionale Dispecerike e Kosovës, pjesë e KOSTT, që të fillojë me kufizimet e energjisë elektrike.

Kufizimet fillojnë nga ora 8:00 e të hënës.

Këto kufizime, në bazë të planit të dërguar do të jenë deri në 2 orë për të gjithë konsumatorët.

“Pra, konsumatorët gjatë ditës së hënë do të kenë nga 6 orë energji elektrike dhe 2 orë kufizime”, thuhet në njoftim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore