Molliqaj kritikon deputetët e LVV-së që e braktisën seancën: Pushtetet autoritare s’duan ballafaqim

Kryetari i Partisë Social Demokrate të Kosovës, Dardan Molliqaj, ka kritikuar deputetët e Lëvizjes Vetëvendosje, pasi këta të fundit e lëshuan sallën e Kuvendit kur po diskutohej për tenderët njëburimor.

“Pushteti ‘antikorrupsion’ e paska lëshuar seancën në momentin kur po flitet për tenderët njëburimorë që kanë mbërritur shifrën e qindra milionave”, ka shkruar ai në Facebook.

Molliqaj ka theksuar tutje se “pushtetet autoritare nuk duan ballafaqim”.

“Ato ikin e komunikojnë veç me propagandë videosh në  60 deputetë e asnjë nuk guxon me e çelë gojën për asgjë”, potencoi ai.

Ndryshe, shefja e Grupit Parlamentar të LVV-së, Mimoza Kusari – Lila, ka arsyetuar braktisjen e seancën në fjalë, meqë sipas saj deputetët e pushtetit janë fyer pas deklaratave të deputetes së LDK-së, Hykmete Bajrami e cila e cilësoi Qeverinë si të korruptuar dhe frikacake.

“Ne e lëshojmë këtë seancë nuk kemi asnjë arsye me vazhdu”, është shprehur Kusari-Lila.

Iniciuesja e seancës, deputetja e LDK-së, Hykmete Bajrami, paraqiti rezolutën, ku mes tjerash kërkohet që ministrat t’i raportojnë me shkrim Komisionit parlamentar për mbikëqyrjen e financave publike për numrin e kontratave njëburimore dhe arsyeshmërinë e tyre.

Por, në mungesë të deputetëve ka përfunduar seanca e jashtëzakonshme e Kuvendit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.