Mohammed bin Salman akuzohet për përpjekje “manipuluese” në sistemin gjyqësor amerikan

Një avokat i Hatice Cengiz, e fejuara e Jamal Khashoggi, ka akuzuar Mohammed bin Salman për përfshirje në një përpjekje të paprecedentë dhe flagrante për të “manipuluar” sistemin gjyqësor të SHBA-ve.

E gjitha me qëllim që të “siguronte mosndëshkimin”, pasi dyshohet se urdhëroi vrasjen e gazetarit në vitin 2018.

Avokati Keith Harper i ka kërkuar gjykatësit John Bates të refuzojë një sugjerim të diskutueshëm nga administrata e presidentit Joe Biden që Princit Mohammed t’i jepet imuniteti sovran në këtë rast.

“Gjykata duhet të refuzojë ta mbrojë atë për urdhërimin e tij për vrasjen e banorit në SHBA, Jamal Khashoggi”, thuhet në dosje.

Cengiz e ka paditur Princin Mohammed dhe bashkëpunëtorët e tij në vitin 2020, duke e akuzuar atë për komplot me paramendim për të rrëmbyer, torturuar dhe vrarë Khashoggi në konsullatën saudite në Stamboll në vitin 2018.

Kurse avokati i Princit, Michael Kellogg, ka argumentuar se Cengiz nuk kishte aftësi për të ngritur çështjen kundër klientit të tij, pavarësisht nëse dikush besonte apo jo se ai ishte fajtor për urdhërimin e vrasjes.

Administrata Biden në fund të muajit të kaluar u pajtua me kërkesën dhe ka deklaruar në një dosje ligjore se besonte që Princi Mohammed duhet të merrte imunitet nga gjykata, duke përmendur një vendim të mbretit saudit Salman për të emërojë të birin kryeministër.

Emërimi i Princit Mohammed si kryeministër u njoftua vetëm disa ditë përpara një afati të caktuar nga gjykata për SHBA-të për të ofruar opinionin e vet.

Disa mbrojtës të të drejtave të njeriut e panë masën si një përpjekje nga qeveria saudite për të bindur gjykatën që t’i jepte imunitet trashëgimtarit saudit.

Avokati i tij ka argumentuar se çështja ishte e mbyllur dhe se administrata Biden e kishte hequr juridiksionin e gjykatës për këtë çështje.

Teksa ekspertët kanë thënë se nuk ka gjasa që gjyqtari Bates të hedhë poshtë pikëpamjet e administratës Biden, avokati i Cengiz i kërkoi gjykatësit ta bënte këtë.

Sipas Harper, teksa administrata kishte të drejtë të ofronte mendimin e saj, ai vendim nuk e detyron këtë gjykatë të pranojë përpjekjen flagrante të Princit për të manipuluar juridiksionin e kësaj gjykate dhe të sigurojë mosndëshkimin për vrasjen e tmerrshme që urdhëroi.

Ai ka theksuar se emërimi ishte bërë “me përpjekje të qëllimshme për të manipuluar juridiksionin e kësaj gjykate”.

Harper ka treguar se në asnjë rast tjetër në histori një i pandehur nuk është emëruar në një detyrë të lartë me qëllimin e vetëm për t’i dhënë imunitet sovran.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.