Misteri i vrasjes në Gllogjan – a ishte vrasësi profesionist dhe pse ende s’dihet gjë për të?

Vrasja e trefishtë në Gllogjan të Deçanit mbetet mister, ende.

Deri më tani nuk ka të arrestuar. Megjithatë, kjo vepër është cilësuar si “akt terrorist”, e kryer nga një “vrasës profesionist”.

Derisa kështu e kanë konsideruar njohësit e çështjeve të sigurisë, ajo që e bën akoma më të ndërlikuar rastin është mos posedimi i informatave lidhur me dorasin në fjalë.

Të premten e 26 nëntorit, teksa një autobus që po barte nxënës, i doli në pritë një person i cili shtiu me armë zjarri drejt automjetit, duke lënë të vrarë shoferin dhe dy nxënës.

Avni Islami – ekspert i çështjeve të sigurisë, për Albanian Post, ka thënë se kjo vepër mund të cilësohet si vrasje e rëndë dhe me tendencë të terrorizmit.

“Konsiderohet si i tillë për shkak se dorasi ka gjuajtur me armë zjarri në autobusin ku gjendeshin nxënësit, dhe një rast i tillë kudo në botë, konsiderohet si akt terrorist”, është shprehur Islami.

Sipas tij, meqë po bëhet rreth një javë prej ngjarjes, dhe ende nuk ka ndonjë shenjë që mund të dërgojë drejt arrestimit të kryesit të veprës, ky i fundit për Islamin është konsideruar si një person që mund të ketë edhe vrasje të tjera.

“Si është e mundur që dje pas një kohe të shkurtër, pas një plagosje në Bardhosh të Prishtinës, u arrestua një i dyshuar për plagosjen e dy personave? Kjo do të thotë që ai i cili e ka bërë këtë akt në Gllogjan, është vrasës profesionist i cili nuk lë asnjë gjurmë në vendin e ngjarjes”, shtoi Islami.

Madje, ai theksoi edhe shumën e ofruar nga Qeveria e Kosovës, (20 mijë euro), si dëmshpërblim për atë që jep informacion e që çon në kapjen e dorasit.

“Kjo tregon se Policia e Kosovës është larg informacionit që të vijë deri te arrestimi i atij personi”.

Ndërkohë, ai ngriti edhe dilemën se personi në fjalë mund të jetë larguar nga vendi, dhe mund të gjendet diku jashtë kufijve.

“Duke pasur parasysh se dorasi nuk është larg prej kufirit, mendoj se organet e sigurisë së Kosovës të ndezin nivelin më të lartë të bashkëpunimit me Policinë e Shqipërisë dhe të Malit të Zi, sepse unë dyshoj që ai që e ka kryer këtë vepër makabër nuk është në territorin e Kosovës”.

Në anën tjetër, Rashit Qalaj ish-drejtor i Policisë së Kosovës, për AP ka thënë se sfida më e madhe në këtë rast është mungesa e fakteve dhe dëshmitarëve.

“Deri më tani hetuesit e rastit nuk kanë pasur ndonjë përshkrim, ndonjë informatë mbi kryesin e mundshëm dhe kjo është sfida kryesore”.

Siç thekson Qalaj, duke qenë se ky rast është “i komplikuar”, për shkak të lokacionit ku ka ndodhur, edhe mënyrës se si ka përfunduar, organet e hetuesisë duhet të mos nguten.

“Është një rast shumë sensitiv por mendoj që Policia e Kosovës duhet të punojë qetë dhe ngadalë, t’i bëjë hetimet ashtu siç duhet në mënyrë që sa më shpejt të gjendet ai që e ka kryer aktin dhe të dërgohet para drejtësisë”.

“Çështja e hetimit nuk shkon me afat të shpejt, sepse duhet të merren parasysh të gjitha faktet, të gjitha dëshmitë, në mënyrë që në fund të dokumentohen”, u shpreh ai.

Ndërkohë, për Nuredin Ibishin – njohës i çështjeve të sigurisë, kjo vepër e rëndë me pasoja të tilla së shpejti “do të marrë epilog”.

Edhe për të, pjesa më e ndjeshme e kësaj është mungesa e dëshmitarëve.

“Në raste të tilla kemi parë që është kërkuar ndihmë nga qytetarët, dhe kjo është më se e kuptueshme për shkak se mund ta quajmë si rast ekstra ordiner ose të jashtëzakonshëm”.

“Në këtë rast dështimi qëndron në faktin se dëshmitarët mund edhe të kërcënohen nga kryerësi i veprës, dhe kjo është ajo që mund ta rëndojë dëshmitarin, gati më shumë se të pandehurin sepse ai do ta ketë avokatin dhe mbrojtjen, ndërsa dëshmitari në këto raste mund edhe të jetë në situata të sikletshme”.

Andaj, sipas Ibishit, “në disa raste ata edhe i ikin përgjegjësisë edhe kur janë dëshmues okularë, për shkak të këtyre trajtimeve apo kërcënimeve që vijnë nga ana e kryesit të veprës penale”.

Si ndodhi ngjarja?

Sulmi ndaj autobusit kishte ndodhur rreth orës 19:00 nga një person i maskuar i cili kishte nxënë pritën autobusit, duke i dalë përballë dhe shtënë me breshëri në drejtim të tij.

Raporti i policisë tregoi se dyshimet e para janë se sulmuesi që lëshoi breshëri plumbash, aktin e kreu me një armë të tipit AK-47, apo siç njihet ndryshe si kallashnikov.

Të dhënat e para nga policia ishin se “i dyshuari gjendet në arrati”, kurse “rasti vazhdon në procedurë hetimore”.

Zëvendëskomandanti i Policisë së Kosovës në rajonin e Pejës, Veton Elshani, ka treguar për Albanian Post se policia ka arsye të besojë se “ka qenë vetëm një sulmues me armë”, porse ka refuzuar që në këtë fazë të flas më shumë për motivet e sulmit.

Ai gjithashtu ka refuzuar të tregojë se bazuar në çfarë të dhënash policia ka ardhur në përfundimin se ishte sulmues i vetëm ai që vrau dy nxënësit dhe shoferin e autobusit.

Ndërsa, policët që po vazhdojnë të qëndrojnë në vendin e ngjarjes, të cilët nuk janë të autorizuar të flasin zyrtarisht për media, i kanë thënë ekipit të Albanian Post se parë edhe nga trajektorja dhe vendi ku kanë përfunduar plumbat, target ishte shoferi i autobusit.

E po në ditën e 27 nëntorit, banorët e Deçanit në shenjë proteste dhe solidarizimi me familjet e viktimave kanë ndezur qirinj në fshatin Gllogjan.

Ndërkaq, të dielën e 28 nëntorit, është bërë varrimi i tre personave që humbën jetën si pasojë e këtij sulmi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.