Ekspertët paralajmërojnë se një infeksion bakterial i rrallë, i rrezikshëm, po përhapet me një shpejtësi rekord në Japoni.
Ndërkohë zyrtarët po përpiqen të identifikojnë shkakun.
Numri i rasteve në vitin 2024 pritet të tejkalojë shifrat rekord të vitit të kaluar, ndërsa shqetësimi po rritet se forma më e ashpër dhe potencialisht vdekjeprurëse e sëmundjes streptokokale të grupit A do të vazhdojë të përhapet, pas pranisë virulente dhe infektive në Japoni.
Instituti Kombëtar i Sëmundjeve Infektive (NIID) ka bërë me dije se ka ende shumë faktorë të panjohur në lidhje me mekanizmat pas formave të rënda të streptokokut dhe ne nuk jemi në fazën ku mund t’i shpjegojmë”.
Shifrat e përkohshme të lëshuara nga NIID regjistruan 941 raste të STSS u raportuan vitin e kaluar.
Në dy muajt e parë të vitit 2024 janë regjistruar 378 raste, me infeksione të identifikuara në të gjitha, përveç dy nga 47 prefekturat e Japonisë.
Teksa njerëzit e moshuar konsiderohen në rrezik më të madh, lloji i grupit A po çon në më shumë vdekje në mesin e pacientëve nën 50 vjeç, sipas NIID.
Nga 65 personat nën 50 vjeç që u diagnostikuan me STSS midis korrikut dhe dhjetorit 2023, rreth një e treta, ose 21, vdiqën.
Shumica e rasteve të STSS shkaktohen nga një bakter i quajtur streptococcus pyogenes. E njohur më shpesh si strep A – mund të shkaktojë dhimbje të fytit, kryesisht te fëmijët, dhe shumë njerëz e kanë pa e ditur.
Por bakteret shumë ngjitëse që shkaktojnë infeksionin, në disa raste, mund të shkaktojnë sëmundje serioze, komplikime shëndetësore dhe vdekje, veçanërisht në të rriturit mbi 30 vjeç.
Rreth 30% e rasteve STSS janë fatale.
Njerëzit e moshuar mund të përjetojnë simptoma të ngjashme me të ftohtin, por në raste të rralla, simptomat mund të përkeqësohen duke përfshirë streptokokën, bajamet, pneumoninë dhe meningjitin.
Në rastet më të rënda mund të çojë në dështim të organeve dhe nekrozë.
Disa ekspertë besojnë se rritja e shpejtë e rasteve vitin e kaluar ishte e lidhur me heqjen e kufizimeve të vendosura gjatë pandemisë.
Në maj 2023, qeveria uli statusin e COVID-19 nga klasa e dytë – e cila përfshin tuberkulozin dhe Sars – në klasën e pestë, duke e vendosur atë në një nivel ligjor me gripin sezonal.
Ndryshimi nënkuptonte se autoritetet lokale nuk ishin më në gjendje të urdhëronin njerëzit e infektuar të qëndronin larg punës ose të rekomandonin shtrimin në spital.
Po ashtu masa i shtyu njerëzit të ulnin vigjilencën e tyre, në një vend ku mbajtja e gjerë e maskave, dezinfektimi i duarve u vlerësuan me mbajtjen relativisht të ulët të vdekjeve nga COVID-i.
Rreth 73 mijë vdekje nga COVID-19 u regjistruan krahasuar me më shumë se 220 mijë në Britaninë e Madhe, e cila ka një popullsi pak më shumë se gjysmën e asaj të Japonisë.
Ken Kikuchi, profesor i sëmundjeve infektive në Universitetin Mjekësor në Tokio, është tejet i shqetësuar për rritjen dramatike këtë vit të numrit të pacientëve me infeksione të rënda invazive streptokoke.
Ai beson se riklasifikimi i COVID-19 ishte faktori më i rëndësishëm pas rritjes së infeksioneve me streptococcus pyogenes.
Kjo, sipas tij, ka bërë që më shumë njerëz të braktisnin masat themelore për të parandaluar infeksionet, siç është dezinfektimi i rregullt i duarve.
Infeksionet streptokokale përhapen përmes spërklave dhe kontaktit fizik. Bakteri gjithashtu mund të infektojë pacientët përmes plagëve në duar dhe këmbë.
Infeksionet e streptokokut A trajtohen me antibiotikë, por pacientët me sëmundjen streptokoke më të rëndë invazive të grupit A ka të ngjarë të kenë nevojë për një kombinim të antibiotikëve dhe ilaçeve të tjera, së bashku me kujdes intensiv mjekësor.
Ministria e shëndetësisë e Japonisë rekomandon që njerëzit të marrin të njëjtat masa paraprake bazë të higjienës kundër streptokokut A që u bë pjesë e jetës së përditshme gjatë pandemisë.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
