Lajme

Miratohen masat e reja anti-COVID në Kosovë, mbyllen çerdhet


Ministri i Shëndetësisë, Arben Vitia

Qeveria e Kosovës ka miratuar masat e reja kundër pandemisë COVID-19 të cilat do të hynë në fuqi nga 13 shtatori, ku mësimi në nivelin parauniversitar, përfshirë edhe nivelin parashkollor dhe puna e qëndrimeve ditore do të pezullohet deri më 26 shtator. Ndërkaq në institucionet publike dhe private të arsimit universitar mësimi nuk do të mbahet me prezencë fizike të studentëve.

Kështu ka bërë të ditur Ministri i Shëndetësisë, Arben Vitia, në një konferencë për media, ku ka treguar se familjet që kanë fëmijë të regjistruar në institucione parashkollore, ku dy prindërit janë të punësuar, njëri nga ta do të lirohet që të paraqitet fizikisht në punë në periudhën 13-26 shtator.

“Aktiviteti mësimor në institucionet publike dhe private pezullohet deri më datë 26 shtator, i cili vlen edhe për aktivitetin mësimor në institucionet publike e private të arsimit universitar. Për familjet me fëmijë të regjistruar në institucionet parashkollore dhe me dy prindër të punësuar, njëri prind lirohet nga obligimi për tu paraqitur në punë fizikisht gjatë periudhës 13- 26 shtator”.

Vitia ka thënë se ofrimi i dëshmisë së vaksinimit apo testit PCR, antigjen dhe serologjik për COVID-19, do t’iu kërkohet punonjësve të sektorit publik, studentëve që duan të regjistrohen në konvikte, studentëve që duan të hyjnë në objektet arsimore në institucionet private dhe publike të nivelit universitar të arsimit.

“Studentët në mënyrë që të regjistrohen në konvikt duhet të posedojnë njërin nga dëshmitë, si certifikata e vaksinimit, testi PCR apo testi serologjik. Studentët në institucionet publike e private duhet të posedojnë njërën nga dëshmitë e cekura në mënyrë që tu lejohet edhe hyrja në institucion”, shtoi ai.

Ndërkaq, pas 26 shtatorit, Vitia paralajmëroi se dëshmia e vaksinimit apo testeve do të kërkohet edhe për stafin dhe klientët e qendrave tregtare.

“Nga data 26 shtator, klientët dhe stafi në qendrat tregtare, të thirrjeve, dhe disa aktivitete të tjera që paraqesin rrezik të shpërndarjes së virusit duhet të posedojnë njërën nga dëshmitë e përmendura që tu lejohet hyrja në këto objekte”.

Megjithatë masat paraprake vazhdojnë të jenë fuqi, ku kufizimi i qarkullimit të qytetarëve vazhdon të jetë nga ora 22:00 deri në 05:00.

“Të gjitha këto masa do të ndryshohen dhe mund të ndryshohen varësisht nga situata në terren dhe rekomandimet e ekspertëve”.

“Ditëve të fundit kemi qenë dëshmitarë të përmirësimit të lehtë të situatës epidemiologjike”, ka thënë Vitia duke shtuar se përkundër kësaj, situata vazhdon të jetë e ndjeshme.

“Situata epidemiologjike ku për disa ditë me radhë pozitiviteti në testime është 90 për qind jep shpresë por situata mbetet akoma e ndjeshme, me fjalë të tjera jemi në një stad kur ka rënie të numrave por akoma situata epidemiologjike mbetet e paqëndrueshme”, shtoi Vitia.

Përballë sfidës tashmë janë bashkuar edhe një mijë punonjës shtesë shëndetësorë.

“Nga kjo javë ekipet e vaksinimit, do të punojnë shtatë ditë në javë dhe përgjatë festave zyrtare për të ofruar qasje sa më të lehtë për tu vaksinuar”.

Sipas Vitisë, “vaksinimi mbetet opsioni më i mirë, më i lirë dhe më i sigurt për të mposhtur pandeminë dhe parandaluar valë të tjera dhe dhimbje të tjera”.

Sa i përket një grupi qytetarësh të cilët para objektit të Qeverisë së Kosovë kanë protestuar kundër vaksinimit të obligueshëm, dhe që të njëjtit kanë njoftuar se të hënën e 13 shtatorit do të dërgojnë një ankesë në Gjykatën Kushtetuese, Vitia ka theksuar se vaksinimi nuk është obligativ meqë ka edhe mënyra të tjera të dëshmisë.

“Nuk kemi bërë vaksinimin e obligueshëm, janë edhe mundësitë e tjera përmes testeve. Nga të gjitha këto zgjedhje, vaksinimi është zgjedhja më e mirë, më e lirë dhe më e sigurt. Asnjë opsion tjetër nuk është më i sigurt se kaq, mirëpo kjo mbetet në zgjedhjen e secilit qytetarë sepse ne nuk mund ta bëjmë obligative”.

Po ashtu, Vitia ka treguar se rreth 680 mijë qytetarë në Kosovë janë vaksinuar së paku me një dozë të vaksinës anti-COVID.

“I bie mbi 50 për qind e popullatës në Republikën e Kosovës që mund të marrin vaksinë. Lajm shumë i mirë dhe me këtë ritëm shpejt mund të arrijmë nivel të lartë të vaksinimit e të mbrojmë shëndetin tonë e të dashurve tanë”.

E pranishme në këtë konferencë ishte edhe Zëvendësministrja e Arsimit, Shkencës, Teknologjisë dhe Inovacionit, Edona Maloku-Bërdyna, e cila ka bërë të ditur se MASHT-i duke u bazuar në rekomandimet e profesionistëve shëndetësor ka vendosur që aktiviteti mësimor në institucionet publike dhe private të arsimit para-universitar duke përfshirë edhe institucionet e arsimit parashkollor dhe qëndrimit ditor pezullohet deri më datën 26 shtator.

Zëvendësministrja e MASHTI-t, ka treguar se pjesa më e madhe e punëtorëve të arsimit tashmë janë të vaksinuar, duke bërë thirrje për të gjithë punëtorët e arsimit të cilët nuk janë vaksinuar të vaksinohen në atë mënyrë që viti i ri shkollor të mund të filloj në mënyrë të rregullt.

“Sipas shifrave të fundit që i kemi marrë nga drejtoritë komunale të arsimit bëhet fjalë ku diku 80 për qind të personelit para-universitar të vaksinuar me vaksinën anti-COVID, kjo shifër po përditësohet çdo javë nga MASHT dhe ne shpresojmë që trendi i vaksinimit do të vazhdojë të ritet akoma më shumë”, ka thënë Maloku-Bërdyna.

Ajo madje ka folur edhe për humbjet mësimorë që pandemia ka shkaktuar në vitin e kaluar që sipas saj  janë të mëdha edhe efektet e kësaj do të shihen për shumë vite me radhë.

“Synimi i MASHTI-t mbetet që megjithatë rikthimi të jetë në shkolla por ky rikthim të jetë i sigurt”, ka përfunduar Maloku-Bërdyna.

/Albanianpost.com


Lajmet kryesore