Ministria e Bujqësisë për sëmundjen e rënë në dy pularitë: Nuk transmetohet te njerëzit

Ministria e Bujqësisë në Shqipëri, në vijim të lajmit të 16 marsit se 200 mijë shpend kishin ngordhur në dy pulari në Durrës, ka njoftuar se janë marrë masat për shqyrtimin e situatës në vend, gjurmimin, kampionimin zyrtar dhe dërgimin e tyre në Institutin e Sigurisë Ushqimore dhe Veterinarisë (ISUV).

Sipas të dhënave të deritanishme, bëhet fjalë për sëmundjen e Laringotrakeitit, infektiv te shpendët.

Ministria ka bërë me dije se fermat janë vendosur në karantinë deri në daljen e rezultateve laboratorike përfundimtare.

Sëmundja e Laringotrakeitit, bën me dije Ministria e Bujqësisë, prek kryesisht shpendët dhe “nuk është zoonotike”.

“Kjo sëmundje nuk transmetohet te njerëzit dhe as nëpërmjet produkteve ushqimore nga shpendët. Për pasojë, nuk përbën rrezik për shëndetin publik”.

“Është e rëndësishme të theksojmë dhe të sigurojmë konsumatorët se deri më tani nuk ka asnjë rast ku të jetë shfaqur influencë aviare (gripi i shpendëve)”, deklaron Ministria.

Në subjektet e tjera shpendërritëse për vezë e mish, në të gjithë territorin e vendit, autoritetet kanë siguruar se janë marrë masa të menjëhershme për parandalimin e përhapjes së sëmundjes dhe deri më tani nuk është raportuar asnjë rast.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.