Ministri Krasniqi kundër Borrellit: Zgjedhjet në Veri veç përmes peticionit

Kërkesa e Bashkimit Evropian për shkuarje në zgjedhje në Veri të Kosovës përmes dorëheqjes së kryetarëve në Mitrovicë të Veriut, Zubin Potok, Zveçan e Leposaviq, është konsideruar nga Ministri i Administrit të Pushtetit Lokal, Elbert Krasniqi, si kërkesë nga Beogradi.

Ai, në një prononcim për media deklaroi se forma e vetme për të shkuar në zgjedhje në Veri është ajo që e kanë prezantuar me Udhëzimin Administrativ – përmes peticionit qytetar.

“Dorëheqja është kërkesë e Beogradit, ne nuk jemi këtu për t’u brengosur se çka mendon dhe se çka kërkon Beogradi. Ne jemi këtu si përfaqësues të institucioneve për t’u përkujdesur ndaj demokracisë dhe për funksionalizimin e institucioneve tona”, tha Kransiqi.

Ishte Shefi i Diplomacisë së Bashkimit Evropian, Josep Borrell, që gjatë konferencës për media pas përfundimit të takimin në mes të kryeministrit të Kosovës, Albin Kurtit dhe presidentit të Serbisë, Aleksandër Vuçiç, tha se mënyra më e shpejtë dhe më efikase për mbajtjen e zgjedhjeve të jashtëzakonshme është dorëheqja vullnetare e kryetarëve shqiptarë.

Por, Krasniqi ishte krejtësisht i prerë kundër kësaj ideje, madje tha edhe se “kryetarët e komunave e kanë mbështetur procesin e peticionit dhe ata besojnë se kjo është demokracia”.

“Ne duhet të përkujdesemi për demokracinë dhe jo për dëshirat e kujtdo qoftë”, deklaroi.

Borrell: Kurti s’ka qenë i gatshëm për kompromis, kërkonte njohje de-facto para Asociacionit

Për rrugën e Qeverisë së Kosovës që përmes një peticioni t’u hapet rruga rizgjedhjeve atje, Borrell potencoi se është proces tepër i pasgurt.

“BE-ja e sheh si rrugë më të shpejtë e më efikase dorëheqjen e kryetarëve që janë zgjedhur me vetëm 3 për qind, në mënyrë që të mundësohen zgjedhjet e reja. Procedura tjetër e largimit nëpërmjet peticionit është tepër e gjatë dhe e pasigurt”.

Borrell kishte njoftuar se ka marrë garanci nga Vuçiç, lidhur me pjesëmarrjen e pakushtëzuar të serbëve të Kosovës në zgjedhjet e jashtëzakonshme në katër komunat veriore të banuara me serbë etnikë.

“Serbët e Kosovës po ashtu duhet të tregohen konstruktivë e të angazhohen pa kushte në procesin elektoral. Duhet të marrin pjesë në zgjedhje. E mirëpres garancinë që mora nga presidenti Vuçiç”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.