Ministri izraelit thotë se është “e drejtë” të vriten nga uria 2 milionë banorë të Gazës, por “askush në botë nuk do të na lejonte”

Ministri izraelit i Financave, Bezalel Smotrich, tha se “mund të jetë e drejtë dhe morale” të vriten nga uria 2 milionë banorë të Gazës derisa pengjet izraelite të kthehen, por “askush në botë nuk do të na lejonte”.

Në një fjalim të hënën në Konferencën e Katif për Përgjegjësinë Kombëtare në qytetin Yad Binyamin, ministri i ekstremit të djathtë tha se Izraeli duhet të marrë kontrollin e shpërndarjes së ndihmave brenda Gazës dhe pretendoi se Hamasi kishte në kontroll kanalet e shpërndarjes.

“Është e pamundur në realitetin e sotëm global të bëjmë luftë – askush në botë nuk do të na linte të vdisnim nga uria dhe etja dy milionë qytetarë, edhe pse mund të jetë e drejtë dhe morale derisa ata të kthejnë pengjet tona”, tha ai, duke shtuar se nëse Izraeli do të kontrollonte shpërndarjen e ndihmave në vend të Hamasit, lufta do të kishte përfunduar tashmë dhe pengjet do të ishin kthyer.

“Ju nuk mund të luftoni Hamasin me njërën dorë dhe t’i jepni ndihmë me tjetrën. Janë paratë e tij (të Hamasit), janë karburanti i tij, është kontrolli i tij civil i Rripit të Gazës. Thjesht nuk funksionon”, tha ai.

Izraeli ka kontroll mbi ndihmat që hyjnë në Gaza dhe grupet e ndihmës janë përgjegjëse për shpërndarjen e tyre.

Izraeli po përballet me kritika në rritje nga grupet e ndihmës dhe organizatat ndërkombëtare për kufizimin e ndihmave ushqimore për Rripin e rrethuar të Gazës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.