Ministri i Bujqësisë e liron nga detyra këshilltarin Hysen Muzliukaj – i dyshuari për keqpërdorim të detyrës zyrtare

Ministri i Bujqësisë, Pylltarisë dhe Zhvillimit Rural, Faton Peci ka liruar nga detyra këshilltarin e tij Hysen Muzliukaj, i cili gjatë së premtes është arrestuar si i dyshuar për “keqpërdorim të detyrës zyrtare”, derisa ishte drejtor në Komunën e Mitrovicës.

Lajmin e ka konfirmuar për Albanian Post shefja e kabinetit të ministrit, Flutura Mustafa.

“Ministri Faton Peci, deri sa drejtësia ta thotë fjalën e fundit, Z. Muzliukaj e ka liruar nga detyra”, ka thënë Mustafa për AP.

Prokuroria Speciale, ka konfirmuar se të premten janë kryer bastisje në dy lokacione të ndryshme më saktësisht në shtëpinë e kryeshefit ekzekutiv të Bordit të Ndërmarrjes Hidroekonomike “Ibër-Lepenci” dhe ish-nënkryetarit të Komunës së Mitrovicës nga radhët e Lëvizjes Vetëvendosje, Faruk Mujkës dhe atë të ish-drejtorit të Komunës së Mitrovicës gjatë mandatit të kryetarit Agim Bahtirit, aktualisht këshilltarin e ministrit të Bujqësisë, Faton Pecit, Hysen Muzliukajt.

Gjatë bastisjes në njërin nga lokacionet, siç tregon Prokuroria Speciale, ndër të tjera janë gjetur dhe sekuestruar shuma prej 60 mijë euro.

Prokuroria Speciale ka njoftuar se ekziston dyshimi i arsyeshëm se të pandehurit në cilësi të personave zyrtarë, me dashje kanë shfrytëzuar detyrën apo autoritetin zyrtar me qëllim të përfitimit të dobisë së kundërligjshme pasurore për vete apo për tjetrin.

Kështu duke tejkaluar kompetencat e tyre zyrtare dhe nuk i kanë respektuar detyrat dhe përgjegjësitë e tyre që të ushtrojnë funksionin e tyre në bazë të ligjit.

Arrestohen dy zyrtarët e Vetëvendosjes – Prokuroria: “U gjetën edhe 60 mijë euro kesh”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.