Minatorët pezullojnë protestën para Qeverisë

Pas vendimit të Qeverisë së Kosovës e cila ka ndarë të mërkurën mbi 4 milionë euro, minatorët kanë marrë vendim që ta pezullojnë grevën që e kishin paralajmëruar para ekzekutivit të enjten.

Lajmin për Albanian Post e ka konfirmuar përfaqësuesi i sindikatës së punëtorëve të Trepçës, Destan Kërleshi.

“E mirëpresim vendimin e Qeverisë edhe pse me shumë vonesë. Këshilli protestues është mbeldhur dhe ka vendosur që ta pezulloj protestën”, ka thënë Kërleshi për AP.

Është muaji i tretë me radhë që minatorët e kompleksit metalurgjik “Trepça”, nuk kanë arritur t’i marrin pagat.

Qeveria e Kosovës deri më tani nuk kishte ndërmarrë asnjë hap konkret në këtë drejtim – përveç se kishte lëshuar një komunikatë për media ku thuhej se përkrahja financiare për ndërmarrjen “Trepça” varet nga zotimi se do të ulen shpenzimet dhe do rifillojë rritja e prodhimit.

Në gjithë këtë situatë në “Trepçë”, ajo u komplikua edhe më shumë, kur gjykata vendosi që kryeshefi i emëruar për t’i zgjidhur problemet e “Trepçës”, Bashkim Kurti, doli se qysh nga janari kur u emërua pozitën e mbante ilegalisht, meqë nuk i plotësonte kushtet për atë pozitë.

Pastaj, me 2 gusht, Bordi i “Trepçës” njoftoi se në vend të Kurtit emërohet si ushtrues detyre i Kryeshefit, Faton Ahmeti, i cili kishte ushtruar padi ndaj Kurtit dhe gjykata i dha të drejtë në shkallën e parë.

Mos përmirësimi i kushteve të punëtorëve të Trepçës, ka dërguar në greva të njëpasnjëshme.

Kompleksi metalurgjik Trepça, deri në vitet 90 atëherë kur ishte përkeqësuar situata politike, ishte llogaritur si një prej ndërmarrjeve më të mëdha, jo vetëm në Kosovë, por edhe në territorin e Jugosllavisë së atëhershme.

Rënia e prodhimit ka nisur në vitet 90 kur regjimi i atëhershëm i Serbisë ka vendosur masa të dhunshme në Kosovë, kështu duke mbyllur gati të gjitha ndërmarrjet dhe institucionet në vend.

Ndërmarrja nuk ka arritur asnjëherë të vihet në funksion të zhvillimit ekonomik të Kosovës, por pritet të kalojë nën Fondin Sovran të Qeverisë së Kosovës.

Fond ky i cili do t’i marrë nën pronësi të gjitha asetet strategjike të Kosovës, për të investuar më pas në rritjen e vlerës së tyre, ndërsa miratimi i tij është paraparë që të bëhet brenda vitit 2023.

“Ka shumë punëtorë mbi tokë, për xehet e pakta të nxjerra nga nëntoka” – Kurti ndan 4 milionë euro për pagat e minatorëve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.