Minatorët në grevë prej 30 ditësh, vazhdon heshtja institucionale

Janë bërë 30 ditë prejse kur minatorët e kompleksit metalurgjik “Trepça” janë futur në grevë, meqë nuk janë paguar qysh nga muaji maj, derisa menaxhmenti akoma nuk u ka paraqitur asnjë plan konkret për të dalë nga kriza.

Ndonëse, Sindikata e Trepçës kishte pritshmëri që takimi të mbahej këtë javë mes kryeministrit të Kosovës, Albin Kurti dhe Bordit – i njëjti s’dihet se a do të mbahet.

Përfaqësuesi i sindikatës së punëtorëve të Trepçës, Destan Kërleshi, në një përgjigje me shkrim për Albanian Post thotë se situata tani është shumë e rënduar.

“Gjendja është në të njëjtën situatë, shumë e rënduar. Minatorët janë në një situatë të vështirë ekonomike dhe heshtja e institucioneve relevante është për të ardhur keq”.

Kërleshi pohon se edhe takimi mes bordit dhe kryeministrit ka pak gjasa që të mbahet këtë javë.

“S’kemi informacione nëse do të ndodh ndonjë takim, por nëse ndodh shpresojmë që të ketë rezultate konkrete jo vetëm takime boshe ashtu siç ka pasur në të kaluarën”, ka thënë Kërleshi për Albanian Post.

Njëri nga punonjësit në Trepçë, i cili çdo ditë udhëton nga Vushtrria në Mitrovicë për të kryer punën e tij kishte thënë për Albanian Post se “90 për qind jemi në kredi, familjet jemi duke i mbajtur duke marrë borxh”.

“Që nga muaji maj jemi pa paga. Qeveria s’është duke ndërmarrë asgjë dhe ne nuk jemi duke e ditur se çfarë po ndodh pasi askush s’po na informon”, deklaroi ai.

Sipas tij, ka pasur shitje në “Trepçë” gjatë këtij viti prandaj s’është aspak e arsyeshme mos pagesa e punonjësve.

“Po, ka shitje nuk është që s’ka pasur shitje. Por, ku janë duke shkuar të hollat ne nuk e dimë”, duke shtuar se vazhdimisht ka parregullsi të llojeve të ndryshme “ka tendera, ka borxhe shumë”.

Si Qeveria që është e mbyllur për informacione, ngjashëm po sillet edhe menaxhmenti i “Trepçës”.

“Asnjë informacion nuk e jep menaxhmenti për paga ata janë duke e bojkotuar punën. Situata është shumë e rëndë”, ndërsa thotë se “asnjë person nga institucionet s’ka ardhur për vizitë”.

Qeveria e Kosovës ka deklaruar javën e kaluar në një deklaratë për shtyp se përkrahja financiare për ndërmarrjen “Trepça” varet nga zotimi se do të ulen shpenzimet dhe do rifillojë rritja e prodhimit.

Në gjithë këtë situatë në “Trepçë”, ajo u komplikua edhe më shumë, kur gjykata vendosi që kryeshefi i emëruar për t’i zgjidhur problemet e “Trepçës”, Bashkim Kurti, doli se qysh nga janari kur u emërua pozitën e mbante ilegalisht, meqë nuk i plotësonte kushtet për atë pozitë.

Pastaj, me 2 gusht, Bordi i “Trepçës” njoftoi se në vend të Kurtit emërohet si ushtrues detyre i Kryeshefit, Faton Ahmeti, i cili kishte ushtruar padi ndaj Kurtit dhe gjykata i dha të drejtë në shkallën e parë.

Përkundër të gjitha zhvillimeve Kurti vazhdon të mos deklarohet për situatën, derisa gjatë fushatës zgjedhore e kishte vlerësuar si “krim të madh” mosinvestimin në Trepçë.

“Mosinvestimi në ‘Trepçë’ është një ndër krimet më të mëdha në Kosovën e pasluftës, sepse nuk është krim vetëm kur bën diçka keq por edhe kur s’bën diçka mirë, e ke përgjegjësinë për diçka të tillë”, ishte deklarata e kryeministrit të Kosovës, Albin Kurti, në janar të 2021-së, gjatë kohës kur ishte në opozitë.

Më 5 gusht, kryetari i Lidhjes Demokratike, Lumir Abdixhiku, ka reaguar për krizën në kombinatin metalurgjik, duke kritikuar veçanërisht kryeministrin e Kosovës, Albin Kurti, për gjendjen e rënduar të minatorëve.

Ai ka njoftuar se të hënën ka qëndruar në Trepçë, derisa ka treguar edhe arsyen përse nuk ka reaguar më herët për krizën në ndërmarrje: “Kam hezituar t’i takojë me shpresën se çështja do të zgjidhej pa komplikim. Çdo involvim i yni partiak, barte rrezikun e politizimit të kauzës së tyre”.

“Por neglizhenca institucionale, e shtetit, e qeverisë popullsite, e vargut të gjatë të atyre përfituesve që Trepçën e Minatorët i përdorin si pamflet elektoral njëpërdorimësh, ka bërë observimin tonë të duket të pakuptimtë. Prandaj sot qëndrova me ta. Vizitova dhe pashë kushtet – jo vetëm të rënda të punës, por antihumane. Aq antihumane, sa nuk i besoni pa i parë vet aty!”.

Mos përmirësimi i kushteve të punëtorëve të Trepçës, ka dërguar në greva të njëpasnjëshme.

Kompleksi metalurgjik Trepça, deri në vitet 90 atëherë kur ishte përkeqësuar situata politike, ishte llogaritur si një prej ndërmarrjeve më të mëdha, jo vetëm në Kosovë, por edhe në territorin e Jugosllavisë së atëhershme.

Rënia e prodhimit ka nisur në vitet 90 kur regjimi i atëhershëm i Serbisë ka vendosur masa të dhunshme në Kosovë, kështu duke mbyllur gati të gjitha ndërmarrjet dhe institucionet në vend.

Ndërmarrja nuk ka arritur asnjëherë të vihet në funksion të zhvillimit ekonomik të Kosovës, por pritet të kalojë nën Fondin Sovran të Qeverisë së Kosovës.

Fond ky i cili do t’i marrë nën pronësi të gjitha asetet strategjike të Kosovës, për të investuar më pas në rritjen e vlerës së tyre, ndërsa miratimi i tij është paraparë që të bëhet brenda vitit 2023.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.