Presidenti i Kroacisë, Zoran Millanoviç, derisa ka falënderuar presidenten e Kosovës, Vjosa Osmani, për pjesëmarrjen në organizimin tradicional “Sinjska Alka” të dielën, ka thënë se Kosova dhe Kroacia kanë pasur një fat të ngjashëm historik, derisa ka konsideruar se pavarësisht mbështetjes së aleatëve gjatë luftës së vitit 1999, ajo ka filluar të zbehet në ndërkohë.
“Kosova ka pasur shumë mbështetje, që humbi dhe u zhduk në ndërkohë. Dhe tani ata janë braktisur”, ka deklaruar presidenti kroat gjatë adresimit në qytetin e Sinjit, derisa ka përmendur faktin se pesë vende anëtare të Bashkimit Evropian (BE) – Spanja, Greqia, Sllovakia, Rumania dhe Qiproja – akoma nuk e kanë njohur pavarësinë dhe sovranitetin e Kosovës.
“Prandaj ajo [presidentja Osmani] është këtu sot dhe kjo është arsyeja pse, përveç festimeve tona dhe ditëve tona të krenarisë dhe lavdisë, kjo është edhe një shenjë mirënjohjeje për vendin tonë mik”, ka shtuar mes tjerash ai, ashtu sikurse e ka cituar platforma kroate e lajmeve “Index” të dielën.
Ndryshe, presidentja Osmani ka marrë pjesë në organizimin tradicional “Sinjska Alka” për nder të sakrificës së ushtarëve kroatë në mbrojtje të atdheut, ndërsa në një postim në “Facebook” të dielën, ka thënë se “Sinjska Alka” është një nga ngjarjet më të rëndësishme për popullin mik të Kroacisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
