Milatoviç shpreh keqardhje për situatën në Veri: Dialogu zgjidhja e vetme

Presidenti i Malit të Zi, Jakov Milatoviç, ka thënë këtë të marte se i vjen “shumë keq” për pamjet që i kanë ardhur nga Veriu i Kosovës, pas situatës së krijuar, ku protestuesit serbë kanë sulmuar trupat paqeruajtëse të KFOR-it.

Milatoviç ka treguar se për atë se çfarë ndodhte në Veri ka biseduar me Presidenten e Kosovës, Vjosa Osmani, dhe atë serb, Aleksandër Vuçiç.

“Unë tashmë e kam diskutuar këtë me presidentin e Serbisë dhe presidentin e Kosovës, duke u përpjekur të dërgoj një mesazh paqeje nga Mali i Zi dhe të inkurajoj dialogun si zgjidhjen e vetme për imazhet që të gjithë i shohim që vijnë nga veriu i Kosovës”, ka thënë Milatoviç gjatë vizitës së tij të parë në Bruksel.

Milatoviç synon që gjatë mandatit të tij si president i Malit të Zi do të kontribuojë që marrëdhëniet me vendet fqinje të jenë në nivelin e duhur.

“Mesazhi i tretë që dua t’ua përcjell aleatëve tanë në Aleancë është ai që ka të bëjë me politikën tonë të jashtme dhe anëtarësimin në Bashkimin Evropian, se qëllimi gjatë presidencës sime është që Mali i Zi të hyjë në BE dhe të forcojë marrëdhëniet e fqinjësisë së mirë me të gjitha vendet e Ballkanit Perëndimor”, pohoi ai.

Ndërkaq, kreu malazez gjithashtu ka theksuar se qëllimi i tij është që Mali i Zi gjatë mandatit të tij të anëtarësohet në Bashkimin Evropian.

“Kur erdha në Bruksel, pritej plotësisht që të vizitoja selinë e Aleancës për të dërguar një mesazh se Mali i Zi ishte, është dhe do të jetë një anëtar i besueshëm i NATO-s, një aleat i besueshëm dhe kjo është politika që do ta promovojë si president i ri i Malit të Zi”, shtoi ai.

Ndryshe, të martën vazhdoi tubimi i serbëve para objekteve komunale në veri të vendit për të kundërshtuar hyrjen e kryetarëve të rinj në zyra. Përveç njësiteve elitare policore të Kosovës, një prani e shtuar e ushtarëve të KFOR-it – kryesisht trupa amerikane – janë vendosur para objekteve të komunave në këtë zonë.

Dhjetëra pjesëtarë të KFOR – kryesisht hungarezë dhe italianë – u lënduan gjatë një ndërhyrjeje për t’i shpërndarë protestuesit serbë në Zveçan të hënën. Pasi paqeruajtësit e NATO-s kërkuan nga protestuesit të shpërndahen, ata nuk pranuan dhe hodhën gurë, shok-bomba e koktej molotovi.

Gjithashtu, veturat e ekipeve të gazetarëve kosovarë janë dëmtuar të hënën dhe të martën nga persona të panjohur në Leposaviq, Zubin Potok e Zveçan. Veturave u janë shpërthyer gomat dhe në to janë vizatuar simbole nacionaliste serbe. Janë dëgjuar edhe këngë shoviniste.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.