Microsoft-i po heton ndërprerjet që prekën përdoruesit e Teams dhe Outlook

Kompania Microsoft po heton një ndërprerje që ka goditur përdoruesit e produkteve të saj në mbarë botën, duke përfshirë Teams dhe Outlook.

Kështu, kompania ka bërë me dije se po heton “çështjet që ndikojnë në shumë shërbime të Microsoft 365”.

Me këtë i është referuar një grupi produktesh që përfshin shërbimin e mesazheve dhe videokonferencave Teams, emailin Outlook dhe programet Word dhe Excel.

Produktet e Microsoft 365 kanë miliona përdorues në mbarë botën dhe të mërkurën e 25 janarit në mëngjes mijëra prej tyre raportuan ndërprerje në Downdetector, një faqe që regjistron probleme me produktet e teknologjisë.

Raportimet përfshinin përdorues në Mbretërinë e Bashkuar, SHBA, Australi dhe Brazil duke theksuar probleme edhe në shërbimin e lojërave Xbox Live dhe biznesin e kompjuterëve cloud të Microsoft-it, Azure.

Në fillim, kompania bëri me dije se e kishte “izoluar problemin në çështjet e konfigurimit të rrjetit” dhe se po analizonte “strategjinë më të mirë zbutëse për t’i trajtuar këto pa shkaktuar ndikim shtesë”.

Më vonë, Microsoft-i ka treguar se është rikthyer pas një ndryshimi të rrjetit që supozohet se po shkaktonte problemin.

Ndërkaq, ndërprerja ka ardhur disa orë pasi Microsoft-i raportoi zbutjen e kërkesës për shërbimet cloud në rezultatet e fundit tremujore.

Gjithashtu ka parashikuar se të ardhurat e tremujorit të tretë në biznesin inteligjent cloud – burimi më i madh i të ardhurave të kompanisë – do të ishin në rangun prej 21.7 miliardë dollarë deri në 22 miliardë dollarë, pak më poshtë parashikimit mesatar të analistëve prej 22.14 miliardë dollarësh.

“Mungesa e vogël në parashikimin e të ardhurave të Microsoft-it në cloud ka të ngjarë vetëm një reflektim i realitetit të ri ekonomik me të cilin po përballen bizneset dhe jo një pararojë e diçkaje më të keqe”, ka thënë Bob O’Donnell, kryeanalist në TECHnalysis Research.

Javën e kaluar, kompania ka thënë se po shkurtonte dhjetë mijë vende pune, ose më pak se pesë për qind të fuqisë punëtore globale, duke përmendur një ndryshim pas pandemisë në zakonet e shpenzimeve digjitale dhe dobësinë në ekonominë globale.

Edhe kompani të tjera të teknologjisë në SHBA kanë njoftuar shkurtime të vendeve të punës, duke përfshirë Meta-n dhe Alphabet-in, me pretendimet se ishin zgjeruar tepër gjatë pandemisë.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.